Ryçond Santos do Nascimento a inicia su carera na Universidad di Aruba (UA) na aña 2009. Su tareanan tabata entre otro : (1) haci investigacionnan scientifico; (2) duna les na studiantenan academico den staatsrecht, bestuurs(proces)recht, Koninkrijksrecht, Internationaal recht (3) maatschappelijke dienstverlening y (4) administratieve taken.
Desde e momento cu dr.mr. Ryçond a worde tuma den servicio te cu awe e ta disfruta di hopi respet y admiracion di studiantenan y docentenan na UA. Tambe internacionalmente ta respet’e como un profesor cu ta destaca den su conocemento di derecho constitucional. No mas cu algun siman pasa e tabata orador invita na Universidad di Antias hustamernte pa motibo di su conocemento.
Awor tin algun luna cu na Universidad di Aruba a cuminsa un proceso pa mira con e por kita e profesor respeta aki den comunidad for di su funcion. E motibonan den comunidad no ta wordo mira otro cu persecusion politico. Ta conoci cu e profesor aki no ta sconde su opinion profesional pa cu cosnan cu no ta bay bon den democracia di Aruba. Ta conoci tambe cu e ta Presidiente di e Instituto di Formacion Politico, Fundacion Digna Lacle Herrera. Un instituto cu ta sostene specialmente partido AVP den formacion profesional di esnan cu tin interes den servicio publico. Algo cu ta importante pa Aruba. Esaki sigur na Hulanda ta masha normal cu profesornan tin un of otro afiliacion politico pa yuda forma profesionalnan pa un of mas coriente politico specifico. Sinembargo den caso di Rycond esaki no a keda na consehonan na un banda so, pero hopi bes a asesora Parlamento completo y a forma parti di delegacion di Staten pa duna henter e delegacion di Aruba sosten cu su conocemento di derecho constitucional y specificamente riba e tema di Relacionnan Estatal den Reino. Por a mira fraccion di MEP tambe bishita e docente pa haya conseho.
Awe sinembargo e flechanan di persecusion poltico ta riba Ryçond Santos do Nascimento. Un profesional di taya grandi di nos propio suelo cu a doctora cu un proefschrift cu a acapara respet den henter Reino. E rol di e Rector di Universidad di Aruba ta uno cu ta lanta hopi interogatorio mirando cu di un profesional ta spera cu e no ta forma parti di e weganan politico partidista.
E caso aki sigur si e sigui e rumbo aki lo termina den Corte y lo no ta nada strañoo si atrobe e persiguidornan politico perde e caso y mester paga e victima sumanan grandi cu no ta sali for di nan saco. Ta tempo porta pa haci esunnan cu ta haci nan mes culpabel den funcionnan asina personalmente responsabel pa e sumanan aki y cualkier otro daño cu ta haci na e victima. No ta husto cu comunidad y e victimanan di persecusion cada bes ta esunnan cu ta termina den un posicion cu no tabata necesario si vengansa politico no yega e extremonan aki.
