fbpx
November 29, 2022

E planta di tratamento di awa residual na Bubali ta den un situacion di urgencia

Share on Facebook
Share on Whatsapp
0
0
E planta di tratamento di awa residual na Bubali ta den un situacion di urgencia
E planta di tratamento di awa residual na Bubali ta den un situacion di urgencia

Diahuebs durante rueda di prensa di Gobierno di Aruba, Minister di Desaroyo Teritorial, Infrastructura y Medio Ambiente, drs. Marisol Lopez-Tromp a elabora riba un bishita haci e siman aki na e Rioolwaterzuiveringsinstallatie (RWZI) na Bubali. Alabes a accentua e preocupacion di Gobierno cu e situacion na e planta, pa cual ta haciendo e maximo esfuerso pa remedia mas pronto cu ta posibel.

Ya pa basta tempo tin keho riba holor malo den e area, primordialmente door di ciudadanonan, hotelnan y bishitantenan. Ta asina cu e Minister anterior encarga cu infrastructura, Otmar Oduber, tambe na varios ocasion a indica e importancia y urgencia cu tin na e planta aki.Hecho ta cu e planta di tratamento di awa residual ta den mal estado y e calidad di awa trata tambe a bay atras. Minister Lopez – Tromp a traves di diferente imagen a ilustra e realidad aki y a enfatisa riba e inversion grandi cu ta necesario ‘desde ayera’.

Aruba Tourism Authority (ATA) a pone e suma di 600 mil florin disponibel pa e ‘oxidatie sloot’ pa di e forma aki por cuminsa remedia esaki. Sinembargo e magnitud di e problema ta hopi mas cu esaki. ‘E ta un paso den e direccion cu mester bay, pero e no ta kita e gravedad di e situacion cu tin na e momento aki en realidad.’

Ta importante pa trece dilanti cu a diseña e planta di RWZI casi 50 aña pasa pa un poblacion mucho mas chikito cu esun di awor. Pero tambe den un epoca cu no tabatin e desaroyo turistico cu tin actualmente den e area. Consecuentemente segun e decadanan a transcuri e planta a yega su limite y a surpase, Minister Lopez – Tromp a splica.

A traves di imagennan presenta den e rueda di prensa comunidad por tuma nota di e situacion constata unda cu tin beton bieu, gran cantidad di scheur y awa color scur/lodo cu 3 aña pasa ainda tabata cla, cual sigur ta alarmante. E cosecuencianan negativo di e situacion na e planta di RWZI na Bubali ta trece preocupacion pa e parti di salud publico, medio ambiente, nos lama y rifnan pero tambe pa nos turismo. Minister Lopez – Tromp a enfatisa cu tur e posibel consecuencianan si no actua aworaki ta presenta den un rapport (Carmabi 2019).

Por ultimo, Director di DOW, ing. Marlon Croes tambe a elabora riba e partinan tecnico y accentua e riesgonan cu tin cu e beton, cual lo atende cu ne inmediantamente cu e fondonan procedente di ATA. E trabou aki a cuminsa y ta spera cu aki cuater luna a evita e riesgo di 8000 ton di awa riba caya den e zona hotelero. Cual ta awa residual di hotelnan ‘high-rise’, ‘low-rise’, Dakota y henter Oranjestad.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.