Hopi biaha ta critica Polisnan. Ta mira nan manera personanan hopi serio cu ta sigui nan trabou solamente segun regla y ley. Pero mescos cu den tur organisacion, tin esnan di bon curason y esey un ciudadano a mir’e den un miembro di Cuerpo Policial.
Un ciudadano a post recientemente riba Facebook un filmacion cu el a haci, segun por a compronde, den area di Siribana.
E funcionario policial Dean Nicholson tabata riba caminda pa un reunion. Pero cu bista riba caminda y di leu el a mira un cabayero di basta edad, canando banda di caminda. E persona aki tabata cana cu basta dificultad, haciendo uzo di un kruk. E por a mira cu e tabata cana basta slow. Loke a pasa den su mente tabata cu den e ritmo ey ni den un ora e lo yega su destinacion. E funcionario policial a baha pa combersa cu e anciano y a ofrec’e un lift. E anciano tabata un persona hopi humilde, kende a contesta e Polis “mi no kier stroba ningun hende.”
Despues cu e funcionario a keda insisti, mirando cu solo ta cayente, e pachi a pidie bah’e na un supermercado, unda e lo warda pa su yiu pasa busk’e. E funcionario policial Dean Nicholson a conta cu den auto el a combersa un rato cu e pachi. “El a contami e ta un hende malo pero ora e tabata hoben, e tabata un homber fuerte. El a cordami riba mi opa y oma. Mi ta contento di a yuda e meneer aki canando den e solo cayente merdia 12’or,” el a bisa ora cu a puntr’e l di con el a para pa yuda despues cu centenares di auto a pasa e homber voorbij.
Dean Nicholson sigur ta un ehempel pa tur su coleganan. Apesar di e uniform, nunca perde e humildad.
