Recientemente a tuma luga un reunion interesante entre Minister di Transporte, Comunicacion y Sector Primario, Chris Romero y Directornan di e companianan estatal Arubus NV (Aruparking y Arutram), Setar NV, Telearuba NV, Post NV y ANSA NV. Durante e reunion aki, Minister Chris Romero a haya un actualisacion global di e plannan y ehecucion di proyectonan tumando luga den e companianan aki.
Di su banda, Minister Chris Romero a keda satisfecho di mira e trabounan tumando luga na e diferente empresanan NV cu ta cay bou di su encargo. Por mira tambe e disponibilidad di e empresanan aki pa realisa proyectonan den conhunto, cual ta representa un beneficio pa pais Aruba.
“Mi por a tuma nota cu e NV nan ta hopi interesa pa intercambia ideanan cu otro, pero tambe traha cu otro. E ta algo positivo pa mira cu e companianan estatal cu ta bou di mi encargo, ta trahando hunto y na beneficio di nos comunidad”, asina e titular di Transporte, Comunicacion y Sector Primario a duna di conoce.
