Diadomingo 8 di Maart 2020 Muchanan sabi ta organisando un festival di canto di mucha titula: “Festival Bos Escolar, Edicion Cultural”. E festival aki lo cuminsa 4or di atardi y lo tuma lugar den Club Caiquetio. Carchi ta obtenibel pa 10 florin serca cada participante y na porta.
Muchanan Sabi ta un grupo di mucha entre e edad di 3 aña pa 13 aña cu ta practica canto, baile y toca instrumento den nan tempo liber. E grupo di Muchanan Sabi a cuminsa na aña 1995 bou di direccion Sra. Edselyn Figaroa. E meta di grupo ta pa atraves di musica inspira nos mucha nan pa crece sigur di nan mes, cu respet, disiplina y amor pa arte. Atraves di musica nos ta inculca nos cultura di Aruba tambe for di un edad jong caba den nos muchanan.
E prome actividad cu e grupo di Muchanan Sabi lo organisa e aña aki ta un festival di canto escolar bou di scolnan primario. Nos tin 35 participante cu lo participa den e evento aki. E meta di e festival aki ta pa promove nos cultura di Aruba serca nos muchanan. Cada participante lo ta compitiendo representando nan scol den e festival. Nos kier a invita pueblo engeneral di Aruba pa bin apoya nos muchanan pa asina keda engrandese nos cultura.
