Awe mainta Hulanda a informa cu e prome pashent contagia cu Coronavirus a muri. Rijksinstituut voor Volksgezondheid en Milieu (RIVM) a confirma cu ta trata aki di un hende homber di 86 aña di edad, procedente for di Hoeksche Waard y cu tabata interna den Ikazia Ziekenhuis na Rotterdam. Ainda no ta conoci con e homber a pega cu e virus COVID-19. Ta diadomingo ultimo el a presenta na Spoedeisende Hulp na Hospital cu keho di su “urineweg”, pa cual a haci diferente test y a resulta cu ta Coronavirus e tabatin. A intern’e den un camber di isolacion y awo ta verificando cua nurse y dokternan a trata a pashent pa mira si nan tin sintoma of tin keho riba nan salud.
Di acuerdo cu Ikazia Ziekenhuis, e homber no a biaha pa ningun pais cu tin Coronavirus ni tampoco tabatin contacto cu un persona cu lo tabata na un di e paisnan aki.
Ta bon pa splica cu te awor, mas o menos dos di cada dies pashent contagia cu Coronavirus ta bira hopi malo. Den casonan asina no por tene nan den isolacion na cas, sino mester interna nan den Hospital. Y den e caso aki, por dura simannan largo prome cu nan por cura di e retonan di salud cu Coronavirus ta trece cune.
Porcentahe di morto ta un estimacion
Rijksinstituut voor Volksgezondheid en Milieu (RIVM) a informa cu e porcentahe di morto bou di pashentnan contagia cu Coronavirus ainda ta na 2%. Ta subraya si cu e porcentahe aki ta un estimacion, basa riba informacion disponibel na e momentonan aki. Te cu awor, e casonan fatal ta di pashentnan di edad avansa of cu ya tabata sufri di un enfermedad cronico caba.
Cantidad di casonan na Hulanda ta subiendo
E cantidad di casonan di pashentnan contagia cu Coronavirus na Hulanda a subi awe for di 82 pa 128 pashent, asina Rijksinstituut voor Volksgezondheid en Milieu (RIVM) a anuncia awe mainta. Di e 128 casonan, un total do 101 pashent a pega cu e virus den otro pais of a pega dor di otro pashent cu tin’e caba. Di e pashentnan nobo, solamente 5 ta interna den Hospital, tur otro ta na cas den isolacion.
Mester menciona cu ayera diahuebs tabata e prome dia cu e casonan a subi asina tanto. Hulanda actualmente ta den e fase di “indamfase”, unda ciudadanonan cu tin keho di dolor di garganta of a caba di regresa di biahe for di areanan di risico. E siguiente fase awor lo rekeri extra medidanan, specialmente ora cu Departamento di Salud Publico di Hulanda lo no por atende tur e meldingnan y e lista di areanan di risico sigui crece. Kico Gobierno di Hulanda lo haci e ora ey, nan no kier a bisa ainda.
Coronavirus: Locual Bo mester sa:
