fbpx
November 28, 2022

Uitzendbureau Flexo Manpower VBA ta celebra 15 aña di existencia

Share on Facebook
Share on Whatsapp
0
0
Uitzendbureau Flexo Manpower VBA ta celebra 15 aña di existencia
Uitzendbureau Flexo Manpower VBA ta celebra 15 aña di existencia

Marlyn Maduro, e uitzendkracht cu a bira directora ta sigui e rumbo di difunto Hub
Diasabra ultimo, dia 1 di maart, Flexo Manpower Services VBA (FLEXO) a celebra su 15 aña di existencia. E uitzendbureau cu oficinanan na Aruba y Corsow a habri su portanan oficialmente na 2005, bou liderazgo di difunto Hub Verhalle. Den un interview Marlyn Maduro, Managing Director FLEXO, ta conta e historia di e organisacion y con FLEXO a cuminsa originalmente, pa conmemora Hub.

Di Flexo N.V. pa Flexo Manpower Services VBA

Ya caba na 1997 Hub tabata labora como un HR consultant pa diferente companianan rubiano bou nomber di Flexo N.V. Door di un crecemento den e demanda di su clientenan pa trahadonan temporal, Hub a cuminsa inclui gradualmente trahadonan riba su payroll, locual a resulta cu e compania por a lansa oficialmente na 2005 den su forma actual: Flexo Manpower Services VBA. Marlyn Maduro, ta corda: “Tur cos a cuminsa na un scala chikito; gewoon pasa bishita clientenan pa bebe koffie. Si Hub tabata wak mi na oficina e tabata manda mi riba caya. ‘Ban, bay bebe koffie’, e tabata bisa. E contacto personal aki ta un caracteristica importante di Hub. E tabata mira e potencial den hende y inverti den nan. Asina mi mes a cuminsa tambe, prome como un uitzendkracht na 2007, y Hub a dunami e espacio y guia pa mi por a keda desaroya mi mes te cu awor directora”.

Win Win Win
A traves di e añanan FLEXO a crece di un oficina cu tres empleado riba 25m2 pa un oficina di 400m2 cu 15 empleadonan. Locual si no a cambia ta e atencion personal y e guia cu FLEXO ta ofrece su clientenan y trahadonan durante un uitzend-traject. “Nos semper ta bay pa un win win win resultado”, Marlyn ta splica. Nos kier pa e cliente ta satisfecho, cu e uitzendkracht ta bay trabao contento y cu nos a facilita e colaboracion aki ta haci nos feliz”.
FLEXO ta mira colaboracion cu diferente organisacionnan como un responsabilidad importante di un doño di trabao. E uitzendbureau ta un socio di Trampolin pa Trabao, un fundacion cu ta yuda hende cu un limitacion haya trabao, y asina FLEXO ta intermediando pa por lo menos 20 persona cu limitacion caminda ya caba a logra pa 12 di nan yega na un trabao. “Nan ta hende sumamente balente y dedica na nan trabao, cu casi bo mester manda nan cas ora nan ta malo”, ta comenta Marlyn. “Ademas, nos ta guia stagiaires di EPB y EPI continuamente y nos ta traha hunto cu Jalken Antonia riba e ‘Inspiratietour’ di e programa “From Good to Great” pa alumnonan di scolnan secundario. E tour ta culmina cu un rifamento unda e ganadornan por loop mee cu nos pa un siman, un biaha mas win win win”.

Logronan Importante

Un logro importante pa FLEXO tabata e ricibimento di e prome uitzendvergunning oficial di Aruba na 2014. Marlyn Maduro ta hari: “E tabata e caracter perfectionista di Hub cu a zorg cu nos por a ricibi e honor aki. Ora e ley a cambia, e tabata e prome na Directie Arbeid en Onderzoek cu tur rekesitonan necesario pa e vergunning. Semper Hub tabata actual cu tur desaroyonan den e area di labor”. Un otro logro cu ta bal wordo menciona ta e proyecto di Hato Airport Expansion project (2015-2018) unda FLEXO a manda un grupo grandi di persona, cu paña di siguridad, helm y boots. Na Aruba e proyecto mas grandi te cu awor ta pa Aruba Aloe na 2019 unda un cantidad grandi di uitzendkrachten, di locual shete tabata personanan cu limitacion, a yuda e compania cu un order grandi di Merca.

Cu Mira pa Futuro

Entretanto ta casi un aña cu Hub a fayece, pero FLEXO keto bay ta duna honor na su nomber. Marlyn Maduro: “Semper Hub tabata disponibel pa mi y e team, cla pa scucha y cu conseho, y bo por a yame semper dia y anochi. Hub tabata laga bo sinti na cas. Igual pa e uitzendkrachten, pe tabata sumamente importante cu nan ta wordo paga na ora. Si e tin di para den rij na banco pa busca nan salarionan den cash, pasobra pa kalke motibo nan no por a bin busca nan check, Hub tabata haci’e”. E dedicacion aki pa coleganan y uitzendkrachten FLEXO ta sigui: “Nos ta traha cu hende y pa hende, y cu un devocion asina hera bo ta lubida cu bo ta trahando”, segun Marlyn Maduro.

Flexo Manpower Services VBA ta specialisa den e empleo temporal di trahadonan den casi tur sector. Nan ta yuda yena vacaturanan fiho, ta ofrece training y e servicio di payroll. Mas informacion pa doñonan di trabao y solicitantenan por wordo haya riba www.flexomanpowerservices.com, y e ultimo vacaturanan ta wordo poni riba nan pagina di Facebook.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.