Casi 70 aña pasa tres mucha homber den nan binti aña a bay haci un coy maldad y a finalisa riba lama grandi, pasando den un odisea cu hamas nan lo lubida. Un di nan so ta na bida awendia: Jose Francisco Wever, miho conoci como Buchi Panama.
Den combersacion cu e figura conoci aki den mundo deportivo pero desconoci den mundo di pesca, Buchi Panama ta recorda tur hende cu “lama ta pa pisca no pa hende. Piscadonan ta subi lama, pasobra esey ta nan pan di cada dia, pero otronan bay landa so”.
Na aña 1950 Buchi, hunto cu Simon y Yendi tabata na un fiesta di famia na Zeewijk. Cu poco drinks den curpa a sali di fiesta cu e intencion di horta un auto, pero no a haya uno. A dicidi di bay na pier y a subi un boto di bela cu nan a haya eynan cu intencion pa bay Colombia un rato pa keiro. Un pais unda nunca nan a yega.
A pasa 29 dia largo riba lama grandi, dianan sin awa ni cuminda, y ni lagrima ora cu nan mester a tira e curpa di Yendi den lama riba e di 28 dia di nan odisea. Un dia despues un barco a bin descubri nan un poco dilanti costa di Panama. Pa Yendi tabata laat, pero pa Buchi y Simon, tabata manera cu nan a nace di nobo.
E prome dianan perdi riba lama, tabatin un poco di yoramento, el a admiti, pero despues di esey tabata simplemente “confia y pone tur cos den man di Dios,” Buchi tabata ripiti cada bes.
