Diabierna anochi a tuma luga dia uno di Festival un Canto na nos Himno y Bandera, pa loke ta trata categoria 4 pa 6 aña y esunnan di 13 pa 17 aña. Un publico grandi a respalda e muchanan riba Plaza Betico Croes, unda cu a presenta cancionnan dedica na nos Himno y Bandera.
Resultadonan ta como lo siguiente:
Ganado absoluto Pre-Infantil categoria 4-6 aña: Ian Tromp cu e cancion “Contento mi ta”.
Di dos luga: Jaymerson Kelly cu e cancion “Un Arubiano Chikito”.
Di tres luga: Qu-Lainey Jansen cu e cancion “Ban Baila cu Ada”.
Un pabien ta bay na e otro participantenan cu tambe a haci un super bon papel cu ta: Kasey, Lysanne, Akyrah, Kitai, Jizienne y Garienne.
Pa loke ta e categoria hubenil 13-17 e resultadonan ta como lo siguiente:
Ganado absoluto: Gismary Linarez cu e cancion “Mi Bandera ta mi Halanan”.
Di dos luga: Jetzenia Croes cu e cancion “Stim’e, ta di nos e ta”.
Di tres luga: Jaydienne Croes cu e cancion “Den mi sanger”.
Un palabra di pabien tambe ta bay na e otro participantenan di e categoria aki cu ta Nathan, Sendy, Zhaisky, Gianimaris y Jorzinho.
Awe diasabra lo tin presentacion di e muchanan pa categoria 7 pa 9 aña y esunnan di 10 pa 12 aña. Final lo ta riba diadomingo.
Mientras tanto pa e festival di adulto tin 17 grupo registra cu 41 cantante. E prefinalnan lo ta riba dianan 11 y 12 di maart mientras cu e final lo ta riba 14 di maart.
