Famia di Pau Martijn no a logra haya “closure” ainda

Preparacionnan pa bay Bajo diadomingo mainta a keda cancela y famia cu esaki no a logra haya un “closure” den e caso di Pau Martijn, kende ta perdi for di dia 29 di februari ultimo.

Diadomingo mainta tempran un grupo di boluntario consistiendo di buceadonan boluntario y miembro di Cruz Cora bou guia di Search & Rescue tabata para na un di e piernan na Zeerover. E intencion tabata pa subi lama pa busca “algo” pa haya sa kico a pasa cu e buceado Pau Martijn. Esaki sinembargo no a logra.  

E plan di awe tabata pa bay awe mainta na e ultimo caminda cu a señala Pau, unda el a baha bay fondo. “Famia y esnan cu tabata conoce kier a haya mas un “closure” di loke por  a pasa. Y nos kier a haci lo maximo pa logra esaki,” Adolph Croes di Search and Rescue a bisa 24ora.com na e sitio. A hinca un plan den otro pa yega mas cerca pa haya “algo”.

Ora ta papia di Bajo, mester ta consciente cu esaki ta keda den awa teritorial di Venezuela, y mester sigui reglanan. “Nos a purba via di autoridadnan pa haya aprobacion pa haci e buskeda eynan sin riesgo pa ningun hende. Mirando cu nos no a haya aprobacion ainda, nos a dicidi cu e no ta bay door. Bo no ta bay expone bo hendenan den awanan no ta un area di Aruba. P’esey nos a hala atras completamente,” Croes a bisa mainta tempran den presencia di e boluntarionan cu a acudi na e sitio.

Ki ta bay pasa awo, no ta conoci. Ta bay consulta cu tur hende, pasobra tanto e organisacion como e famia kier pa tur acto tuma luga di forma responsabel, pa no expone ningun hende. Ta bay analisa si tin plan B y kico esaki lo ta.

A scoge e dia di awe pasobra e lama ta miho cu e dia di e sucedido y a scoge hendenan cu conoce e area y cu experiencia, kendenan conoce e coriente den e bisindario. A traha henter un plan con cada buceado ta move eybou. “A tene cuenta cu tur aspecto di siguridad, pero esey ta “on hold”, aworaki,” Croes a bisa.