fbpx
November 27, 2022

Minister Dangui Oduber ta felicita tur Hende Muhe riba nan dia!

Share on Facebook
Share on Whatsapp
0
0
Minister Dangui Oduber ta felicita tur Hende Muhe riba nan dia!
Minister Dangui Oduber ta felicita tur Hende Muhe riba nan dia!

“Feliz dia internacional di hende muher. Un dia special pa e ser excepcional den nos bida. Pabien na tur e hende muhenan riba nan dia awe”, ta deseo di Minister Dangui Oduber awe diadomingo, riba Dia Internacional di Hende Muhe. “Awe ta un dia pa reconoce e importancia di e hende muhe den nos comunidad y den nos bida diario”.

Mas leu e mandatario a enfatisa cu “Nan tin rol fundamental pa nos tur y ta central di cada famia. Sin importa si ta un ama de cas, un docente, un secretaria, un asistente, un consehero, un housekeeper, un manager, un CEO of cualkier otro funcion den nos comunidad, cada un dama tin un responsabilidad hopi importante den su bida diario como ser femenino”, asina e mandatario a enfatisa.

“Nos mester gradici tur ser femenino aki pa nan contribucion na nos pais. Ami ta gradici tur e damanan aki den nos comunidad pa tur locual nan ta haci. Tur ser femenino ta mes importante. Den mi bida diario tin hopi dama importante, cuminsando na mi casa, mi mama, suegra, tantanan, primanan, esunnan cu ta yuda mi incondicional na mi bureau. Tur masha danki”, di acuerdo cu Minister Dangui Oduber.

Dia Internacional di Hende Muhe

Dia 8 di maart mundialmente ta celebra Dia Internacional di Hende Muhe. E aña aki ta enfoca riba e hecho cu nos ta den e momento adecua den historia pa haci tur lo posibel pa yuda forsa pa un mundo mas balansa den genero. E hende muhe a cana un caminda largo den e proceso aki, aunke cu ainda tin mas pa cana y pa logra. E tema di e aña aki ta “An equal world is an enabled world”, como un yamada pa miho balans rond mundo den e oportunidadnan pa e hende homber y e hende muhe.

E dia aki mes a nace despues cu e partido Sociaista di Merca a organisa un Dia di Hende Muhe dia 28 di februari 1909 na New York. Su siguiente aña, a sugeri durante e International Socialist Woman’s Conference cu lo mester celebra Dia di Hende Muhe tur aña! E prome pais pa reconoce y cuminsa celebr’e ta Union Sovietica riba dia 8 di maart 1917. Nacionnan Uni a adopta e celebracion aki desde aña 1975.

Awendia, e fecha special aki pa celebra Dia Internacional di Hende Muhe ta hasta un dia liber den varios pais, ta celebracion grandi di femenismo den otro paisnan y ta hasta dia di protesta den algun pais.

Na Aruba, e ta mas bien un dia pa conscientisa comunidad riba e oportunidadnan cu tin pa e hende muhe, pa celebra nan logronan y na mes momento el a bira un dia comercial tambe den cual e hende muhe ta haya regalonan special riba “nan” dia.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.