Raad van Advies ta negativo riba pakete nobo di medida

3:25 pm

Diabierna atardi miembronan di Parlamento di Aruba a ricibi un pakete grandi di medida cu mester compaña Prespuesto 2020 di Gabinete Wever-Croes. Ta trata di 8 medida di sea aumento di impuesto of impuesto nobo y alocacion di fondonan den Presupuesto 2020 cu ta bay kita di presupuesto di promocion di turismo di ATA y di companianan di utilidad. Aparte di e pakete di medida tin presupuesta entrada di 15 miyon cu ta spera di licencia pa plantacion di Marihuana/Cannabis na Aruba.

E racha di medidanan nobo di Gabinete Wever Croes ta encera:

Introduccion di un BBO adicional di 6% como tasa di importacion; Esaki lo mester trece den caha di gobierno 35 miyon florin;
Aumento di Deviezenprovisie cu 50%; Esaki lo mester trece den caha di gobierno 25 miyon florin;
Kita e tarifa special di impuesto di ganashi (IPC) di Hotelnan; Esaki lo mester trece 15 miyon florin extra den caha di gobierno;
Kita 35 miyon florin for di Fondo di Promocion di Aruba Tourism Authority (ATA);
Kita areglo di pensioen interno den empresanan; Esaki lo mester trece den caha di gobierno 15 miyon florin;
Kita un parti substancial di e derecho di descuento di impuesto riba mantencion di edificionan particular; Esaki lo mester trece den caha di gobierno 10 miyon florin;
Forsa companianan di utilidad pa cumpra e terenonan cu nan ta estableci riba dje den eigendom; Esaki lo mester trece aden 17 miyon florin;
Tambe ta conta riba 15 miyon florin cu otorgamento di licensia pa planta Cannabis/Marihuana na Aruba;

E medidanan presenta pa Gabinete Weever-Croes ta conta cu sosten y aprobacion di e partidonan MEP, POR y RED hunto cu nan respectivo Parlamentarionan.

Raad van Advies den su conseho riba e pakete di medidanan aki ta duna un opinion hopi skerpi contra di introduccion di e medidadanan aki. Den su conseho, Raad van Advies ta bisa cu e consecuencianan di e medidanan nobo ta aki devastador pa economia di Aruba y pa poder di compra di Pueblo.

Tambe Raad van Advies ta mustra Gabinete Wever Croes den su conseho cu e medidanan aki ningun momento ta un “reforma fiscal” pero un “opeenstapeling” di impuestonan nobo. Raad van Advies ta bay ampliamente den e ramficacionnan negativo di cada un di e medidadanan.

E ultimo reunion entre Conseho di Minister y CAft di Hulanda, e organo di supervision financiero cu mester sostene e Presupuesto na Conseho di Minister di Reino. Nan conseho tabata pa yega na un Presupuesto balansa, no necesariamente kiermen aumenta entrada, sino mas bien reduci gasto, locual no ta haciendo suficiente ainda.

Raad van Advies a termina su conseho na Gabinete Wever Croes cu un posicion fuerte consehando gobierno pa no presenta e cambionan aki di impuesto na Parlamento, pasobra nan implicacionan pa Aruba lo ta hopi negativo.