fbpx
November 27, 2022

Chinto Erasmus Historia ‘chikito’ di un famia ta bira historia ‘grandi’ di un isla completo

Share on Facebook
Share on Whatsapp
0
0
Chinto Erasmus Historia ‘chikito’ di un famia ta bira historia ‘grandi’ di un isla completo
Chinto Erasmus Historia ‘chikito’ di un famia ta bira historia ‘grandi’ di un isla completo

Contrario na e historia ‘grandi’ tocante suceso importante y por lo general tocante protagonista politico, expresa den e canon historico cu tur hende mester conoce y siña na scol, tin e historia ‘chikito’ di hende den nan circulo socioeconomico, cu den nan memorianan personal ta describi e recuerdonan di nan bida individual den e contexto di nan famia y contactonan social.

Dr. Wim Rutgers a skirbi e reseña aki tocante Mi memorianan; Aruba di antaño segun Chinto Erasmus cu a sali dia 30 di januari 2020 den Amigoe na Hulandes. Fundacion Corector di Papiamento a traducie na Papiamento.

E memorianan personal aki conoce mientrastanto un tradicion largo na Aruba cu a cuminsa den añanan trinta di siglo pasa cu H.E. Lampe, Aruba voorheen en thans (1932) y Laura Wernet Paskel, Ons eilandje Aruba (1944), sigui pa un gran cantidad di otro obra, manera di W.F.M. Lampe, Frank Williams, Marco Christiaans, Ernesto Rozenstand, Richard de Veer, Clyde Harms, Benjamin Romero Barliza te Chinto Erasmus, Mi memorianan; Aruba di antaño na 2019.

Nos tur conoce e storianan ‘grandi’ tocante explotacion di oro na Aruba, pero di Chinto Erasmus (1917-1998) nos ta haya sa con su tata na 1917, pa motibo di necesidad economico, nos por bisa tambe pa motibo di puro pobresa, ta sali bay mondi pa busca piedra adecuado, garna nan y despues saca oro for di nan pa bay bende esaki na Playa cu e platé Henriquez Quandt.

Cu un storia ‘chikito’ asina e explotacion di oro ta haya un perspectiva personal y na mes momento nos ta lesa profundamente tocante e circunstancianan primitivo y pober cu e Arubiano tabata biba aden, mester a biba aden, prome cu yegada di e refineria di petroleo, tempo cu e hombernan tabata haya nan mes forsa pa bay traha na Cuba, Venezuela of Corsou pa un sueldo chikito cu nan por a manda cas.

Mi memorianan ta un balente buki di mas o menos doshen pagina, den cual Chinto Erasmus na edad di 75 aña ta describi su bida fructifero di trahado.
Ta pasa cu ne loke ta pasa cu Aruba: di un pobresa preocupante pa un prosperidad relativo.

Den su memorianan Chinto Erasmus ta duna un relato cronologico detaya di aña 1912 te final di añanan ochenta, di cual e añanan di su hubentud ta haya masha hopi atencion y ta cubri casi mita di e buki, pa despues segun cu e edad ta subi e tempo di contamento ta acelera.
Den e generacionnan por nota bon cla e diferencia entre pobresa y prosperidad, e tata cu ta bay traha na Cuba y Corsou, su trabou duro den cunucu cu resultado instabil pa motibo di secura, cogement’i job aki aya, te cu finalmente por papia di un entrada mas of menos fiho y di progreso.
E yiu homber ta haya mas posibilidad, pasobra, a pesar di poco estudio, e ta haya oportunidad pa bay traha den e refinerianan di Eagle y Lago, unda cuminsando cu e trabounan mas simpel e por sigui subi den posicion pa motibo di su empeño y inteligencia.

publicacion
Tempo cu Chinto Erasmus na edad di 75 aña a dicidi di skirbi su memorianan, su intencion tabata pa haci esaki como informacion pa su yiu- y nietonan, no pa publicacion.
Esey ta splica tambe dicon e ta pone asina tanto atencion na e asuntonan familiar.
Den e comunidad chikito di antaño Aruba ta manera un famia grandi y tur hende conoce otro.
Pero como cu fuera di esey tin tambe asina tanto informacion interesante di ‘Aruba di antaño’, su yiu muhe Etty a dicidi di type y publica e texto cu tabata skirbi den algun blocnote.

Despues di su añanan basta ‘rebelde’ di yoncuman – e tabata tin dos yiu prome cu el a casa -Chinto Erasmus tabatin un bida familiar rico cu su casa Chita Tromp (1904-1986) y su shete yiunan. El a lanta na Tamarijn y a muda despues pa Tanki Leendert pa cual comunidad el a nifica hopi: ‘Tanki Leendert y Aruba por progresa solamente si su hendenan y nan famia progresa.’
Deporte y enseñansa tabata di sumo importancia p’e.
Na 1951 e tabata iniciado di ‘Tropical Country Club’ y di e edificio di e club cu su biljart, pelicula gratis y un biblioteca. Erasmus a percura pa Tanki Leendert a haya luz di caya na 1952.
El a hunga un rol grandi pa haya un tereno disponibel y adecuado pa deporte y un espacio apropia pa Kapel Monte Calvario. E tabata e motor tras di Scol Preparatorio Aurora y Colegio Ora Ubao.
E tabata politicamente activo pa Henny Eman bieu y e lucha pa Status Aparte.
Cu tur e tipo di informacion aki, nos ta mira con un historia inicialmente chikito di famia ta bira historia grandi di henter un isla y ta refleho di tempo di un desaroyo di apenas un siglo for di punto di bista socioeconomico.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.