Willemstad Curacao:Djaluna 9 di mart 2020, alrededor di 17.04 or, Sentral di Polis a dirigí unidatnan polisial pa Weg naar Sint Willibrordus pa un aksidente di tráfiko entre un outo di famia i un konvoi.
Na yegada di e promé unidat na e sitio menshoná, el a topa un outo di famia i un konvoi ku a aksidentá.
For di investigashon preliminar ku polis a realisá na e sitio, a resultá ku shofùr di e outo di famia tabata kore riba e kaminda menshoná den direkshon di Jan Kok. E shofùr aki pa un motibu ku te ainda ta deskonosí i ku ta den investigashon, a kore na man robes di kaminda. Nèt na momentu ei e konvoi koriendo den direkshon di Willibrordus tabata aserkando. E outo di famia a bai dal ku su banda drechi kontra di e konvoi.
Debí na e impakto fuerte aki e konvoi a baha na man drechi di kaminda. A konsekuensia di esaki shofùr di e outo di famia a sufri leshonnan basta serio i a bin fayesé na e sitio. Ambulans a transportá shofùr di e konvoi pa sala di emergensia di CMC pa tratamentu médiko.
Dos okupante di e konvoi a haña tratamentu di e personal di ambulans na e sitio.
Dòkter di polis ku a presentá na e sitio i a konstatá morto di e dama Selina Albina Kastaneer, nasé na Kòrsou, dia 16 di desèmber 1969.
Personal di tráfiko ta kontinuá ku e investigashon.
