fbpx
December 03, 2022

Universidad di Aruba: Trabou Social y boluntarismo

Share on Facebook
Share on Whatsapp
0
0
Universidad di Aruba: Trabou Social y boluntarismo
Universidad di Aruba: Trabou Social y boluntarismo

Universidad di Aruba den su programa di ‘Social Work & Development’ ta enfoca den e prome aña di e programa (estudio) riba trabou boluntario. E studiantenan mester haci 24 ora di trabou boluntario tanto den e prome semester como den e di dos semester na un instancia/ organisacion social. Trabou boluntario ta un di e maneranan mas efectivo pa haya experiencia signicativo y practico den e veld di Trabou Social. E ta duna studiantenan di Trabou Social y Desaroyo un chens pa prepara nan mes pa e trabou real den practica. Tambe trabou boluntario ta bon pa Trahadonan Social cu experiencia pa haya un chens pa amplia y reinforsa nan experiencia.

Ademas di e bon experiencia cu e studiantenan ta haña pa medio di boluntarismo, nan ta haña e oportunidad pa pone e teorianan di sciencia social den practica. Tambe nan ta wak con e practica ta diferente cu teoria. Teorianan cu ta wordo duna ta derecho humano, balornan, etica, comunicacion interpersonal, y introduccion den Trabou Social. E combinacion di e teorianan y trabou boluntario ta complementa otro y asina duna e estudio un balance y calidad duradero. Adicionalmente e studiantenan ta wordo prepara durante ‘skills labs’ unda nan ta wordo forma den abilidadnan di teamwork, comunicación, sensibilidad y comprensión di dinamismo di grupo. Esaki ta un preparacion profesional p acu e studiantenan pa asina bira Trahadonan Social den futuro.
Universidad di Aruba, especialmente ta reinforsa tambe e colaboracion entre universidad y agencianan social pa asina crea oportunidad pa Trahadonan Social colabora cu otro y tambe siña for di otro. Pa medio di colaboración, ta crea un dinamismo cu ta benificia tur partido (studiante, Trahado Social, agencia social y universidad) pa ta actualisa y al tanto di desaroyonan den nos comunidad.
E studiante di e programa di ‘Social Work & Development’ ta un ‘ganashi’ pa e area social y principalmente den e trabou boluntario. Pasobra e studiante ta observa, analisa y guia tanto e organisacion, boluntario y actividadnan social den un direccion cu ta mehora e desaroyo y cremento di tanto e individuo, organisacion y nos isla den un manera profesional.

Universidad di Aruba ta manda un felicitacion na tur Trahado Social den e luna dedica na nan profesion. Y un danki grandi na cada organisacion social cu ta habri portanan di oportunidad na nos studiantenan durante nan carera den e programa di ‘Social Work & Development’.
Nos ta wardabo diajuebs día 26 di maart na nos “open House”. Pasa y cerca conocí cu nos studiante y alabez tuma e oportunidad pa informa bo mes di nos programa. Pa mas información bisita nos website ua.aw of sigi nos ariba Facebook of Instagram.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.