fbpx
December 02, 2022

Bin siña con pa cuida curpa y evita dialisis awe na MFA Savaneta

Share on Facebook
Share on Whatsapp
0
0
Bin siña con pa cuida curpa y evita dialisis awe na MFA Savaneta
Bin siña con pa cuida curpa y evita dialisis awe na MFA Savaneta

E cifranan di dialisis ta basta alarmante pa un isla chikito manera Aruba, ta loke Raiza Vrolijk, enfermera specialisa den e area aki a duna di conoce durante un charla cu ta dr. Horacio Oduber Hospital ta organisando.

E charla cu ta hiba e lema di “Prevencion pa deteccion” tabatin su prome sesion na Cas di Mito (MFA Paradera) unda expertonan den e specialismo aki a hiba palabra.

Vrolijk a splica cu a base di cifranan cu ta wordo duna tur aña a base di dialisis, tin un proyeccion cu ta mustra cu Aruba ta den e top 6 na mundo, di pashentnan nobo cu ta cuminsa dialisa. “Esaki ta cifra basta alarmante pa un isla chikito,” el a bisa. Tambe tin un pronostico duna cu pa aña 2040 malesa di Riñon ta den e top 5 malesanan cu ta conduci na un morto prematuro.

Cu e tipo di charlanan aki kier encurasha e hendenan pa un bida saludabel pasobra malesa di Riñon por wordo preveni.

Awe, diamars, tin otro charla e biaha aki na MFA Savaneta, cuminsando pa 6’or di atardi. Raiza Vrolijk mes lo ta un di e oradornan, pero tambe tin e team di pre-dialyse di hospital, dietista (riba nutricion) y e nefroloog cu lo papia riba e procedura di dialisis y loke por haci pa evita malesa di Riñon.

Vrolijk a duna cinco tip cu por yuda: Si ta sufri di presion halto of sucu, haci tur lo posibel pa controla nan; haci ehercicio di minimalmente 30 minuut pa dia; come fruta y berdura; evita cuminda procesa y bebe suficiente awa pa e curpa por haci su trabou.

“Tur cos nos lo por evita, pero moderacion ta e yabi. Kisas no por kita tur cos, pero moderacion ta importante. Mester siña pueblo kico ta cuminda cu nutricion, kico ta saludabel y kico no pa cada persona por guia su mes miho ora di cumpra algo di come,” Vrolijk a splica.

El a haci un invitacion no solamente na pashentnan di dialisis, pero tur ciudadano pa acudi na e charla awe tardi 6’or na MFA Savaneta, y lo finalisa pa 9’or di anochi. E ta un anochi yena di informacion cu por yuda e ciudadanonan cuida nan mes miho. Tambe lo tin un caminata mañan, 11 di maart, cuminsando na Brandweer banda di aeropuerto, pasa riba Linear Park y yega te na West Deck (5 kilometer) y bolbe Brandweer. Ambos evento lo ta gratis pa participantenan.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.