E ex edificio di Consulado Venezolano cu a coy candela na inicio di siman, tabata den proceso di benta. Despues di e sucedido, a dicidi di tuma medida drastico. Diasabra den oranan di marduga 24ora.com a cubri un candela na e sitio aki, aparentemente causa pa e adictonan ambulante cu a invadi e luga.
Stanley Brown, di e compania casnan.com awe mainta tabata na e edificio situa den Paardenbaaistraat pa supervisa e trabounan di limpiesa cu tabata tumando luga.
Brown a splica cu nan ta representa propietario di e edificio ya cu esaki tabata poni na benta. Despues di e sucedido di diasabra marduga cu Bomberonan a acudi cu urgencia pa paga candela, a dicidi di tuma medida drastico. A pidi e adictonan ambulante encarecidamente pa bandona e edificio, cual nan a coopera tambe.
Aunke e compania interesa no a finalisa e compra, a dicidi di haci e luga completamente limpi y na mesun momento seya e bentananan parti abou cu palo. E luga tin hopi bentana, y si resulta cu kibra mas bentana, lo claba palo riba nan, te ora cu cuminsa cu e trabounan di renobacion.
