Museo Arkeologico a tene su rueda di prensa riba celebracion di Dia di Himno y Bandera. Pa Museo Arkeologico ta un honor y placer, pa riba e dia nacional, Dia di Himno y Bandera, por ta anfitrion di Club Kibrahacha, y asina promove e balor grandi cu nos grandinan tin pa nos pais.
Mas cu claro e salanan di exposicion di Museo Arkeologico, tanto e sala di exposicion permanente, como e sala di exposicion temporal lo ta habri pa publico riba e dia aki.
Alabes Fundacion 1403 lo t’ey presente pa bende publicacion cientifico den e serie di publicacionnan di Museo Arkeologico, esta the Archeology of Aruba, the Pictographs and Pictroglyphs. Tur esaki lo sosode entre 10’or di mainta pa 2’or di merdia, cu excepcion di Chichi’s Snack cu lo t’ey presente na e museo te cu 6’or di atardi, cu su festival di cuminda, asina brindando publico e oportunidad pa disfruta di un dushi cuminda crioyo, na Museo Arkeologico henter merdia.
Hunto ta invita un y tur pa bin pasa un dushi rato riba nos dia nacional, Dia di Himno y Bandera, na Museo Arkeologico.
Club Kibrahacha
Brigitte Loefstop ta Lider di Proyecto di e evento cu lo ta combinando hunto cu Museo, riba dia 18 di Maart. El a splica un tiki kico e evento ta encera, ki tur ta bay tin pa brinda pueblo di Aruba y tambe kico ta e tema y meta.
E tema pa e evento aki ta Sweet Old Memory Expo, na unda cu kier a trece dilanti e dushi temponan di antes, den un forma di exposicion di pintura y hopi mas.
Meta ta pa recauda fondo pa nos grandinan pa asina demostra cu nunca no ta laat pa siña algo nobo. Locual cu ta encera e exposicion ta pinturanan riba canvas di paisahe di Aruba, pinta pa miembronan mes di Kibrahacha. Tambe lo bay tin bunita obranan traha na man. Ta bay tin un seccion di 26 potret di naturalesa di Aruba, hunto cu parhanan di Aruba.
Lo bay tin un skina di tur sorto di cos dushi cu lo ta bolo, cuki di lerchi, drigidek, lo bay tin dulce de leche y hopi mas.
Tambe como entretenimento y atraccion a dicidi pa bin cu cinco grupo di caha di orgel, na unda cu nan lo bay ta situa diferente caminda rond di e museo pa asina publico presente por pasa saca potret cu e grupo di caha di orgel y tambe disfruta di e bunita zonido di dje.
Tambe no por lubida riba nos muchanan, mirando cu riba dia di himno y bandera ta un dia di famia. A dicidi pa bin cu un Kid’s Corner unda cu lo brinda servicio di Cotton Candy, Popcorn, Raspao y Facepainting. Tur esaki lo bay tin riba e dia aki riba dia 18 di Maart pa brinda pueblo di Aruba.
Tambe ta cuminsa for di 10’or di mainta pa 2’or di merdia, unda cu lo bay ta na Museo Arkeologico Nacional Aruba y lo take over e seccion di fruteria. Ta invita henter pueblo di Aruba pa bin pasa un momento agradabel.
