Yury Bracho no ta un persona desconoci na Aruba y ya caba el a yega di tene manifestacionnan contra di abuso di mucha y awo un biaha mas e ta preparando pa un otro manifestacion.
Aña pasa na mei, el a organisa un manifestacion contra abuso di mucha. A pasa 10 luna y nan a priminti’e cu e lo haya un contesta por escrito. Awo 10 luna despues mas caso ta bin dilanti y te ainda no tin nada for di ministernan y presidente di Parlamento di Aruba. Esaki ta motibo cu el a dicidi di organisa otro manifestacion riba dia 27 di maart, for di 4’or di atardi te cu 7’or di anochi, saliendo for di Wilhelminapark pa Parlamento y for di ey ta bay Bestuurskantoor.
Algo cu mester tene cuenta cun’e
Bracho ta pensa cu tur loke e ta haci no ta wordo tuma na serio. E realidad ta mustra totalmente otro. Si 10 luna a pasa y no a haya un contesta, e no kier ta un mas cu ta haci manifestacion na Bestuurskantoor y nada no ta pasa. E no kier pa un aña yega. Ya e ta haya cu 10 luna ta suficiente. Despues di esaki e lo bay tin un otro caminata mas, pero aki algun luna. Si ta necesario e kier bay bek riba caya aki 3 luna.
Reaccion di pueblo
Ora cu Bracho trece su preocupacion dilanti, e no ta mira esaki riba caya, aunke cu riba Facebook hopi hende ta reacciona. “Mayoria tin miedo of nan ta kere cu Facebook ta bay soluciona nos problema of di nos muchanan. Esey no ta e caso. Si nos lanta ariba y pensa cu nos muchanan ta na prome luga y si nos no cana awo, ken lo bay haci’e, ta hopi tristo na Aruba. En particular e caso cu a sosode ultimamente, cual ta preocupa hende,” el a bisa..
Acercamento
Logicamente Bracho a acerca minister y tambe Parlamento durante e lunanan aki. Hasta a entrevist’e. A bis’e cu lo haci cambio na december 2019 y cu e lo haya un contesta, cual nunca a tuma luga. Na januari a bis’e cu mester warda un contesta por escrito y te cu asina leu nada.
E ayudo principal
Bracho ta pensa y segun hopi hende cu ta sostene, cu e castigo maximo ta ok. Pero ta mas importante pa nan haya ayudo psicologico y divulga nan riba un website. Ora cu haci’e un biaha y haya un castigo, e chens pa e bolbe ripiti t’ey. E prizon ta djis un castigo, pero ora cu sali e pensamento no lo keda mescos of lo a bira pio. Tanto e victima como e persona cu a comete e delito, mester haya un ayudo psicologico. Durante cu e ta na KIA y despues di KIA tambe, y pa keda sigui’e.
Tambe tin tanto caso pa luna, pa siman, cu no ta sali na claridad. Cu no ta sali riba social media, pero cu si ta pasando y cu ta keda e mesun cantidad di trahado. Segun Bracho, a yega ora cu tanto pa Minister di Husticia, y Minister di Asuntonan Social, mester por habri un departamento cu ta specialmente pa e casonan aki.
“A yega ora no di politica of ken ta busca fama, pero pa e muchanan aki haya un ayudo, un guia. No cu ta bay Voogdrijraad, ta mandabo Hues, y na su turno ta bay Fundacion Guiami y el a caba. Ora cu un mucha wordo abusa, no ta ok. E ta keda den bo,” sra Bracho a splica.
E ta puntra dicon no ta bin cu mas trahado, dicon no ta pone mas profesional, haci e trabaonan aki. Laga Voogdijraad entrena mas personal y amplia e oficina. Ora cu por ehempel tin casonan cu hopi mama ta menciona, cu tin caso cu e yiu, pero ora bay Voogdijraad, ta un persona ta atende e caso. Si e bira malo of bay cu vakantie, e caso ta manera medio pasa pa olvido. Bracho a sinti cu a yega ora pa sinta y wak kico ta pasando cu e muchanan di Casa Cuna, kico ta pasando cu nan a wordo entrega na famia y kico a pasa despues.
Tambe tin caso cu a duna e tata e yiu y mira kico ta pasando cu e yiu. Bracho ta sinti cu no ta mustrando hopi balor pa nos muchanan. Si gobernantenan no atende e caso di e muchanan, e por bira un preocupacion hopi grandi pa pais Aruba.
Invitacion
Yury Bracho ta invita henter pueblo di Aruba pa cana hunto. A yega e ora pa bisa ta basta y pa tur uni. Ta warda un y tur dia 27 di maart, pa 4’or di atardi te cu 7’or di anochi, saliendo for di Wilhelminapark te cu Parlamento y despues Bestuurskantoor. Union ta haci forsa y a yega e momento pa stop di bay riba Facebook y mas tanto bay sali pa bienestar di nos muchanan.
