fbpx
December 06, 2022

Mayornan y hungadonan awor conoce e meta di AVB Academy

Share on Facebook
Share on Whatsapp
0
0
Mayornan y hungadonan awor conoce e meta di AVB Academy
Mayornan y hungadonan awor conoce e meta di AVB Academy

Arubaanse Voetbal Bond (AVB) a tene un reunion informativo cu mayornan y hungadonan cu ta forma parti di e academia U-15 y U-17. Na e reunion aki a duna informacion kico ta encera den e academia, pero tambe kico ta spera di e hungadonan, kico ta spera di e mayornan, con ta organis’e, con e tin cu bay, kico ta come y bebe di e academia.

E ta algo nobo na Aruba, asina Ing. Richard Dijkhoff, Presidente di AVB, a indica. Pa hopi hende e ta algo diferente. E manera con nan ta custumbra organisa e parti di training, aworaki AVB a duna nan e informacion. E academia a inicia diadomingo di 8:00 pa 10:AM pa muchanan di U-15 y 10:00AM pa 12:00PM pa U-17. AVB a haya su mes ta scoge esaki pa motibo di espacio cu tin durante siman.

P’esey a bira importante pa yega na mas espacio y ta trahando riba esey tambe. A mira un entusiasmo grandi bou di e mayornan y sigur di e hungadonan a compronde e concepto cu a bini cun’e. AVB a haya cooperacion di e mayornan, pero tambe a duna nan compromiso pa haci e proyecto aki uno exitoso.

E reunion organisa cu e mayornan p’e AVB Academy a bay bon mirando e cantidad di persona presente. David Abdul, Coordinador di AVB Academy, a indica cu mas di 100 persona tabata presente, tanto mayornan como e muchanan. Por a mira cu e tabatin hopi interes den e presentacion di e academia, cu ta cay un parti den e programa “Grow Football”. Den e programa aki tin desaroyo di club, desaroyo di coach, desaroyo di talento y team nacional. Durante e presentacion a papia riba desaroyo di talento, unda cu e academia di AVB ta cay boy dje.

Desde cu David Abdul ta bek na Aruba, el a analisa cu Aruba ta mes bon cu Hulandes. El a indica cu unda Aruba tin pa gana ta den e parti di disciplina y mentalidad. Esey ta un punto hopi importante, pasobra pa ta un bon futbolista no ta solamente cuanto gol ta hinca of cuanto hende bo ta hala na banda. Pero ta e pakete completo di fisica, disciplina, mental, tactica. “Futbol no ta solamente con bon bo ta. Mi ta kere mentalidad ta un parti hopi importante,” el a expresa. Tambe inzet ta cay aden, cuanto gana tin pa logra e meta, cuanto gana tin pa bira e profesional cu kier bira. E ta kere cu eynan ta unda por saca probecho di dje.

E reunion a bay bon y a cuminsa cu algo nobo, pero kier a haci un anochi informativon p’e mayornan pa asina por cera un compromiso, asina Reynaldo Geerman, Secretario General di AVB, a indica. A tuma luga firmamento di contract entre e hungadonan, mayor y AVB caminda a pone e reglanan, e criteria cu e mucha ta participa den e academia. AVB a cuminsa cu e informacion di e prome aña, pero e ta un proceso cu lo keda. Segun Reynaldo Geerman, si e ta bon a crea un structura cu lo tin un scol di futbol p’e añanan cu ta bin.

E no ta un cos cu ta stop, asina el a indica. Den e academia a cuminsa cu 4 categoria, esta U-13, U-15, U-17 y U-20. E intencion ta cu mas den aña lo bah’e y cuminsa cu U-9 y U-11, kiermen ta cover tur aspecto di un curriculum di scol bo ta pasa den e academia. Obhetivo di e academia ta pa saca muchanan cu tin talento, hinca nan den un ambiente bou giuanan profesional y mehora nan parti tactico. No solamente e parti tactico di futbol, pero tambe tecnico di futbol y como persona.AVB ta hopi contento pasobra e tabata un necesidad den mercado, pero p’e organisacion e ta un producto di a cuminsa cu e e academia pero ta parti di un pakete di programanan cu AVB ta ehecutando aworaki cu e proyecto di “Grow Football”. Lo sostene e parti di clubnan tambe. Ta bezig cu un “pilot project” cu e clubnan, unda e desaroyo ta cuminsa for di e club y di eynan ta bay na e academia. Di e academia e ora ta bay seleccion, asina Reynaldo Geerman a indica. No solamente e nivel di futbol di parti e academia ta bay subi di categoria, pero tambe AVB ta yudando e clubnan mehora nan training p’e por acopla cu e academia. Caminda e muchanan cu no ta den e academia asina mes ta haya un parti di e curriculum di e academia na e clubnan.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.