fbpx
November 29, 2022

Premier Evelyn Wever-Croes: Relaciona cu posibel efectonan economico di Corona Virus

Share on Facebook
Share on Whatsapp
0
0
Premier Evelyn Wever-Croes: Relaciona cu posibel efectonan economico di Corona Virus
Premier Evelyn Wever-Croes: Relaciona cu posibel efectonan economico di Corona Virus

Conhuntamente cu Minister di Salubridad, Dangui Oduber, Prome Minister Evelyn Wever-Croes den conferencia di prensa di Gobierno di Aruba, a elabora riba e tema di COVID-19. E E tema aki tin e preocupacion di Gobierno di Aruba y tin tambe e atención completo y constante di Gobierno di Aruba.

Gobierno di Aruba a eleva e nivel di preparacion pa Corona Virus na un nivel di crisis y ta awo den man di Gobierno. Prome Minister a enfatisa cu esaki no ta pasobra cu tin caso di Corona Virus na Aruba sino pa asina Gobierno por prepara miho posibel como tambe pa sigura cu tin fondonan disponibel di e fondo di crisis pa asina atende cu esaki.

Prome Minister a anuncia cu Gabinete Wever-Croes lo introduci un ‘economic and innovation stimulus package’ pa absorve e efectonan economico di Corona Virus. Gobierno di Aruba ta trahando riba 3 plan di contingencia:

SALUBRIDAD: Esaki ta na encargo di Prome Minister y Minister di Salubridad. Gobierno di Aruba a eleva e nivel di preparacion pa Corona Virus na un nivel di crisis pa asina Gobierno por prepara miho posibel como tambe pa sigura cu tin fondonan disponibel di e fondo di crisis cu Gobierno a establece na 2018, pa asina atende cu esaki.

TURISMO: E plan di contigencia aki ta pa compensa den caso si nota un caida di turismo. ATA, APA y AAA, dirigi pa Minister di Salubridad, ta trahando riba diferente scenario y e plan di contigencia pa atende cu e eventualidad si nota cu e cantidad di bishitante baha. ATA tin un fondo di emergencia pa cu esaki.

ECONOMICO: E plan di contigencia aki ta cay directamente bou di Minister President, Evelyn Wever-Croes. Si cantidad di turismo baha, esaki por tambe afecta nos economia, hustamente na momento crucial na unda cu Gobierno ta purbando pa rebiba nos economia. Riba proposicion di Prome Minister, Conseho di Minister a tuma e decision diabierna ultimo pa pone mas atencion den inversionnan economico y bin cu e “Economic and Innovation Stimulus Package”. Gobierno kier ofrece ayudo na empresanan chikito y mediano y empleadonan cu haya nan mes den problema financiero door di Corona Virus. E prome fase lo ta pa acelera e solicitudnan di inversionnan cu ya a wordo entrega sin cu e burocracia ta un obstaculo.
Gobierno ta spera asina cu por mantene economia ta draai, particularmente pa sigui duna trabou na esnan cu ta perde trabou. Tambe Gobierno lo establece un fondo economico y di innovacion pa apoya financieramente e empresanan. E cantidad cu lo inverti den e fondo aki ta depende di varios factor. Importante ta pa Presupuesto 2020 cu pronto lo wordo trata den Parlamento, wordo aproba.

Banda di esaki, Gobierno ta solicitando fondonan di organisacionnan internacional cu ta pone fondonan disponibel pa situacionnan asina. Cu e fondo aki y e plan di emergenia cu actualmente ta wordo traha riba dje, Aruba lo ta un di e prome paisnan miho prepara den nos region den e area aki. Esaki ta posibel danki na e hecho cu pa prome biaha den hopi aña, Aruba tin un surplus den nos presuesto.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.