Awe ta un dia hopi importante y grandi, pa motibo cu manera tur aña tin Aruba Doet. Aruba Doet ta e accion boluntario mas grandi di Aruba. Esaki ta e di 8 edicion cu CEDE Aruba ta organisa y ta hopi orguyoso hunto cu Oranje Fonds, cu ta un proyecto cu ta ripiti cada aña tin tanto hende cu ta duna un man, segun Daniel Tecklenborg, director di CEDE Aruba.
Durante e dos dianan aki, esta 13 y 14 di maart, lo realisa un total di 196 proyecto na Aruba. E mayoria di e proyectonan aki ta di Aruba Doet manera trabaonan di verf, trabaonan di drecha cos, trabaonan material. Pero tambe tin un aumento di proyectonan social. Hopi biaha ta hiba cierto gruponan pa sali, por ehempel hendenan grandi, hendenan cu limitacion cu no normalmente ta haya e chens pa haci esaki.
Ta contento cu e desaroyo eynan y ta bay tin mas cu 3800 boluntario cu ta bay traha den e dos dianan aki.
Aruba Doet ta un tremendo evento cu ta pone henter e comunidad di Aruba para hunto. E NGO’snan, tur fundacion, clubnan deportivo, Centronan di bario, etc. cu ta prepara e trabaonan. Tambe un cantidad grandi di compania ta contribui na e desaroyo aki, cu descuento, cu productonan gratis, pero tambe hopi compania cu ta bin cu nan empleadonan, cu ta duna un man durante oranan di trabao.
Esey ta un contribucion di comercio cu CEDE Aruba ta aprecia hopi mes. Asina ta wak cada bes cu den dos dia cuanto bo por logra cu tanto hende, cu den algun ora, ta haci un diferencia.
E lema cu tin pa 8 aña largo ta “Haci bon, Pasa bon”. Nunca a cambia e lema aki pasobra ta wak cu e trabaonan ta duro, pero nan tambe ta fun. E ta trece hende hunto. Tin biaha bo ta cera amistadnan nobo y hopi biaha tambe fundacionnan toch ta keda cu algun di e boluntarionan como boluntario despues. Esey ta un extra logro cu ta stimula tambe.
Aruba Doet no ta para su so. Pa basta aña caba riba e diferente otro isla den Reino, por mira e accion aki tambe ta tumando luga. Asina tin trabaonan na Corsou, Boneiro, na St. Maarten, na Statia y Saba cu tambe ta on den e dos dianan aki.
Tecklenborg a menciona un noticia menos bon, mirando e brote di coronavirus na Europa, e accion di NL Doet a wordo cancela. Miles di proyecto cu a wordo prepara den e ultimo simannan, no a bay door. Ta desea e coleganan di Oranjefonds y tur boluntario y organisacionnan na Hulanda forsa na e momentonan aki. Ta contento cu na Aruba si por a sigui, pero ta para keto un rato cuanto cos a wordo haci eynan, cu awor aki no por bay door.
Gobernadora interino
Gobernadora interino, Yvonne Lacle – Dirksz, a hiba palabra durante apertura di Aruba Doet, e biaha aki na Aruba Donkey Sanctuary. El a comenta cu trabao boluntario semper ta importante den comunidad.
Por consider’e como un win win situation. Door di trabao boluntario, ta duna bo tempo, bo talento, bo habilidad, pero bo ta haya hopi a cambio.
Bo ta ricibi felicidad. Bo ta crea amistad, bo ta conecta cu otro hende y haciendo un otro feliz, bo tambe ta bira feliz.
Su Excelencia ta gradici na tur boluntario. Awe, diabierna 13 y mañan, 14 di maart, boluntarionan tur rond di nos isla lo haci un excelente trabao.
Por ultimo, el a gradici CEDE Aruba. Tambe gradici tur otro organisado y un biaha mas na tur boluntario awe y mañan riba nos isla, cu lo aporta na nos comunidad.
Aruba Donkey Sanctuary
Pa loke ta Aruba Donkey Sanctuary, Desire Elderling, a comenta cu e ta super contento cu tur esnan cu a presenta como boluntario pa asina yuda cu e sanctuario. Si e mester haci’e su so, e ora e no lo yega leu.
Hopi cos lo bay wordo haci. Tambe lo bay duna e containernan un verf. Tur heki cu e buriconan ta kauw riba dje, lo bay pone nobo. En todo caso, hopi cos lo wordo haci durante e dos dianan aki na Aruba Donkey Sanctuary.
Tur ora ta druk na e Sanctuario, segun Elderling. Na final si bo ta interesa pa bira un boluntario di e sanctuario, sea bon bini, yena e formulario y bira uno. E sanctuario ta super contento di e ayudo cu nan lo ricibi awe y mañan.
