Vice Presidente ehecutivo di Republica di Venezuela Delcy Rodríguez, a informa awe mainta e existente di dos caso di coronavirus, cualnan a wordo confirma door di autoridadnan di salud.
Esnan contagia ta un muhe di 41 aña cu tabata na Merca, Italia y Spaña y un homber di 52 aña kende a bishita Spaña. Ambos ta biba den estado Miranda.
E Vice Presidente a informa cu ambos persona ta totalmente aisla y a pidi e pasaheronan di e vuelo di Iberia 6673, di dianan 5 y 8 di maart, cu a biaha cu e dos personanan contagia, pa bay den caurentena preventivo.
Di mesun forma, el a informa cu for di dialuna a stop tur actividad escolar na henter e pais, a recomenda e adultonan grandi pa keda nan cas y e uzo di mask pa drenta Metro di Caracas.
