Den cuadro di bishita di embahador di Suecia na Aruba, a tuma luga un recepcion na Fort Zoutman. Na e ocasion tambe a anuncia oficialmente e cambio den e representacion di e pais aki na Aruba.
Consul Honorario di Suecia na Aruba pa 23 aña Joe Maduro a tuma despedida pa habri caminda pa su reemplasante Yvonne Escalona.E trabou cu e Consulado ta haci na Aruba ta pa yuda mas tanto turistanan di Suecia cu haya cualkier problema.
Pero tambe semper ta busca un forma di cooperacion cu Suecia, entre otro riba innovacion cu nan tin hopi experiencia. Mas ainda awor cu Aruba ta traha hopi riba innovacion y sostenibilidad cu ta un area cu e pais Sueco tin basta experiencia den dje, segun Yvonne Escalona a splica.
“Nan ta un sociedad cu hopi balor cu nan ta apoya manera igualdad entre hende muhe y hende homber; corupcion ta hopi abou. Tin hopi cos cu nos por siña di Suecia,” el a bisa.Consul Honorario nobo pa Suecia ta bay traha pa mira con Aruba por haci miho uzo di e conocemento di e pais ey na bienestar di nos pais.
23 aña Consul Honorario
Cu orguyo Joe Maduro ta corda e 23 añanan cu e tabata Consul Honorario di Suecia na Aruba. “Semper e relacion tabata super bon. Nos a percura pa nan interesnan na Aruba,” Maduro a bisa. “Mi ta sintimi hopi honra cu Suecia a dunami e oportunidad pa honra nan na Aruba pa asina hopi tempo.”Dies aña pasa el a ricibi un condecoracion di e pais ey tambe. Maduro a retira hopi aña caba for di su profesion di abogacia y awor ta dedica na su negoshinan pero tambe yuda den algun fundacion.
