Den un conferencia di prensa WEB a duna informacion di e caso cu nan a haya nan mes confronta cun’e di un consultant cu ta infecta.
Segun nan a splica, e persona tabata di vakantie na Egipto y despues a yega Merca. Despues el a biaha pa Aruba pa haci un trabou y na momento cu e tabata aki, su esposa a inform’e cu un hende den e grupo cu nan a biaha cun’e a test positivo pa coronavirus.
WEB a dicidi di pone den isolacion mientras mesora a laga haci test. Ora cu e resultado a drenta, a informa Gobierno di biaha.
A traha mesora e lista di e personanan cu tabata den contacto directo cu e consultant y a manda esaki pa DVG. Departamento di Salud a tuma contacto cu e personanan riba e lista pa sigui e reglanan y un biaha mas WEB den e conferencia a pidi e hendenan aki pa keda cas den cuarentana. WEB ta haci su parti y pueblo tambe mester cumpli cu su banda. Si un persona wordo instrui pa keda cas, mester haci esaki. Semper por yama e number di contacto suministra of yama 2800101.
Te aworaki ningun esnan cu tabatin contacto cu e consultant tin sintoma. Esaki probablemente pasobra ora cu el a yega Aruba, e tabatin 10 dia cu e tabata malo caba. E virus ta pega durante e di dos y shete dia. Pues el a presenta na WEB riba e di 11 dia y e chens cu e por a plama e coronavirus ta bira un tiki mas chikito.
Informacion te awo ta mustra cu 2 pa 3 hende ta wordo infecta pa un persona cu tin e virus y si e ta emiti fluho (drops). Un persona por tin’e pero si su sistema immuun ta hopi halto, e no ta sinti e sintomanan pisa. Pero ta miho keda cas.
E consultant ta den bon estado y su unico sintoma ta un tos seco. Ta warda 24 ora cu e no tin sintoma, e lo bandona Aruba.
Tambe a sigura cu e awa di WEB no ta contamina cu Covid-19 ni cu nada otro. P’esey ta refuta categoricamente e rumor cu e awa ta contamina. Ta imposibel pa e virus drenta e proceso di produccion di awa.
E persona a traha den e edificio principal y Servicio na Cliente y no a drenta e planta mes.
Tin 13 hende cu ta den cuarentena, ya cu nan tabata den contacto cu e persona aki. Y ta recorda cu e peligro ta ora cu e persona tin sintoma y e contagio1 por sosode entre e di 2 y di shete dia cu e tin e sintomanan.
