fbpx
December 07, 2022

A detene tata iresponsabel cu a huy cu un baby riba su lomba

Share on Facebook
Share on Whatsapp
0
0
A detene tata iresponsabel cu a huy cu un baby riba su lomba
A detene tata iresponsabel cu a huy cu un baby riba su lomba

Un tata a percura pa tene Polisnan ocupa pa mas di un ora largo, ora el a secuestra su mesun baby for di e mama. Parce cu e mayornan no ta cu otro mas y e mama a keda cu custodia di e baby. Pero e tata a yega awe deremate na cas di e mama y a bay cu e mucha forsa, hincando henter e famia den un panico y susto enorme. A dura mas di un ora prome cu Polisnan a logra haya e homber bek y kita e baby for di dje. E ta deteni y awo lo mester bay duna cuenta di su actonan.

Tabata alrededor di 10:00am a drenta informacion di un caso di problema domestico na Macuarima, na Santa Cruz. Ey un tata lo a yega y causa problema, siendo bou di influencia di alcohol of droga. Na yegada di Polis, famia a conta cu e homber a habri porta di un auto, ranca un baby di entre 1 pa 2 aña y a cana bay cune na pia. E homber tabata lomba sunu y tabata razo.

A detene tata iresponsabel cu a huy cu un baby riba su lomba

A detene tata iresponsabel cu a huy cu un baby riba su lomba

Posted by 24ora on Sunday, March 15, 2020

Polis a cuminsa un buskeda den vecindario pa mira si por a topa cu e sospechoso encuestion. E buskeda a resulta envano na un prome instante. Pero no a dura mucho cu a drenta informacion cu a señala e mesun homber aki, cu e baby riba su lomba, coriendo na altura di Cas Ariba, tambe na Santa Cruz.

A haci uzo di varios unidad policial pa cera e area y purba localisa e homber aki cu e baby riba su lomba. Na un dado momento un agente di Polis femenino, su so, a topa cu e homber riba un distancia, hunto cu e criatura. E homber a sinti cu Polis ta su tras, pa cual el a yame famia y a bisa nan cu e sa cu Polis ta su tras y cu e no lo para pa Polis. Ora cu e agente femenino a nota con e homber tabata coriendo, lagando e mucha cay dos biaha for di su lomba, a haci e preocupacion mas grandi ainda.

A pidi mesora pa saca helicopter pa por yuda busca, pasobra den e proceso, a perde e homber for di bista tambe. Unidadnan di Polis for di tur districto a rondona e area for di caminda grandi y den mondi. Finalmente el a crusa di Cas Ariba pa Siribana y di eynan el a crusa bay te Cashero. Eynan si su careda a caba na cas di su ruman homber.

Polis a topa cune y a detene mesora. A kita e mucha for di dje y hib’e for di e sitio. Tur esaki a sosode na un cas unda tambe tin muchanan bibando. Nan tur a keda traumatisa y spanta di locual nan a mira pa via di nan omo. Polis a dedica tempo despues pa papia cu nan y splica kico tabata pasando. A transporta e homber pa Warda di Polis na Santa Cruz y a invita e mama y e baby tambe pa regla un ke otro mesora. E muchanan cu tabata na e cas na Cashero tambe a bay Warda di Polis pa papia cu nan.

E buskeda a dura mas di un ora largo, uzando varios unidad di Polis, pa por a salba e mucha for di un tata iresponsabel.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.