Desde cu un persona su test a sali positivo pa Covid-19, coronavirus, esaki a pone cu hendenan a drenta den panico na Corsou. Despues di a haci test na diferente hende, Dr. Izzy Gerstenbluth, Hefe di Departamento di Epidemiologia, a informa cu e cantidad di caso a subi na 3. Segun Dr. Gerstenbluth tabata monitoria un tiki mas di 40 persona y awo tin 3 caso di coronavirus. Segun Dr. Gerstenbluth, tin 3 caso isola y ta pidi pa tur hende keda trankil. Ta recorda cu ta importante pa laba man cada rato.
Un di e casonan cu a sali positivo tabata di un persona cu a isola su mes y di cual Departamento di Epidemiologia tabata sigui esaki. E test di e persona aki tabata uno inconclusivo, pero despues a resulta di ta positivo. E persona aki tabata den isolacion caba y e contactonan tabata limita. Un otro test cu a sali inconclusivo tambe a keda den isolacion. Tur e personanan aki e departamento concerni a sigui nan desaroyo den e dianan cu ta 14 dia di por a bira malo. Prome a mira entre 5 pa 7 dia si un persona ta bira malo y despues a mira e maximo di 14 dia, di cual si pasa e dianan ey y no bira malo, nan ta keda trankil pasobra e chens pa bira malo a kita. Ainda tin hendenan den isolacion y ta monitoriando nan, pero tin par cu a stop di monitoria pa motibo cu e tempo cu e virus por broei a pasa sin cu a bira malo.
E maneho hiba pa tene hende isola na cas, tur cos haci ta cuadra segun e stipulacion di maneho cerca e Departamento di Epidemiologia cu ta sigui e linea internacional. Mayoria pais na mundo ta sigui e mesun strategia. Segun Gerstenbluth nan no ta haci algo otro of inventa algo nobo, loke cu ta haci ta adapta na e situacion local. E ta reitera cu pa plama e enfermedad di un pa otro ta bin via tosamento, pasobra niestermento no ta un di e sintoma mas.
Medida tuma na e momentonan aki pa loke ta avionnan cu ta bin di Europa, lo permiti solamente esnan cu ta residencia na Corsou y por mustra nan cedula y tambe e ticket di regreso na e aerolinea pa nan por haya un cupo pa regresa Corsou. A tuma e medida aki pa por cuida pueblo mas tanto posibel. Minister di Trafico, Transporte y Planificacion Urbano, Zita Jesus-Leito a bisa cu tin vuelo ta yegando dialuna cu e prome localnan, pero awe ta yegando 5 avion. Di e 5 avionnan aki algo no a bay segun premira cu e aerolineanan y awo ta yegando 9 hende residencia di Corsou. Tur control ta bay conforme e protocolnan y e palabracionnan cu Departamento di Salubridad pa check cu e hendenan drenta ta cumpli cu tur e partinan.
Esaki ta un impacto pa Corsou ta aden e proximo 2 simannan specialmente e sector hotelero. Riba mesa ya caba tin puntonan pa asina sinta discuti cu Minister di Finanza con pa balansa esaki. No ta gobierno so tin e responsabilidad, pero comunidad tambe y banconan. Gobierno ta analisando diferente iniciativa, pero tambe di banda priva lo bin proposicionnan pa yuda den e totalidad aki pa mitiga e sla di e dos simannan cu ta bay dal duro. Segun Minister Giselle Mc Williams a calcula cu e impacto di e virus a dal e sector hotelero 20 miyon di dollar den e dos simannan.
Departamentonan concerni ta bay na hotelnan pa duna nan informacion. Minister Williams ta enfatisa na tur miembro di CHATA of cu no ta miembro, tambe tin deber cu empleadonan. Gobierno ta carga su responsabilidad y ta pone Izzy Gerstenbluth na disponibilidad pa informa y educa nan hendenan, pero ta spera pa nan tambe carga e responsabilidad pa proteha empleadonan y hendenan cu aña den y aña afo a gana placa for di nan.
