Awe tardi, ora e avion di Avianca sali rumbo pa Bogota, lo ta e ultimo buelo por lo pronto. E compania di aviacion di Colombia a informa cu e lo no bula mas pa Aruba te dia 24 di maart. Esey ta un decision preliminar, pasobra Gobierno tin e isla cera pa turistanan te cu dia 31 di maart 2020. Actualmente tin dos vuelo diario for di Bogota, un mainta y otro atardi cu awor ta cancela debi na e decision di Gobierno di Aruba y esun di Gobierno Colombiano cu tambe a cera frontera pa tur turista.
E aerolinea ta existi desde 95 aña pasa, pues for di aña 1925 y pa hopi aña consecutivo ta mantene un relacion estrecho y sin interupcion cu Aruba. Ta bula entre otro cu avionnan modelo Airbus 319 cu tin mas stoel disponibel pa nos destinacion. Avianca ta bula cu no menos di 177 avion pa 104 destinacion den 28 pais. Nan tin un total di 22.000 empleado y nan hubnan principal ta Bogota, San Salvador y Lima. Nan programa di biaheronan frecuente “LifeMiles” ta conta cu no menos di 6 miyon miembro rond mundo.
Avianca ta un opcion no solamente pa Bogota, pero tambe otro destinacionnan domestico den Colombia manera Cali, Medellin y Pereira. Tambe pa mercadonan existente pa Aruba manera Argentina, Brazil y Chile, pero tambe ta brinda oportunidad pa hiba Bo na mercadonan nobo den Sur America manera Costa Rica, San Salvador y Uruguay.
