Docternan na Italia ta opina pa no atende pashentnan riba 80 aña cu a haya Coronavirus

ORANJESTAD (AAN): E ta un critica cu a sali for di tur skina di mundo y dirigi na e docternan na Italia.  Hopi critica contra maneho di salud na Italia!

Debi na cantidad grandi di contagio pa e coronavirus nobo, casonan cu tin poco probabilidad di biba debi na edad avanza of malesanan pre-existente no por tin acceso na servicio di cuido intensivo den caso cu no tin mas lugar den hospitalnan, segun equipo di maneho di emergencia causa pa COVID-19 den region Italiano di Piamonte.

Unidad di Crisis di e region a traha un protocol pa determina ki pashent lo ricibi tratamento den cuido intensivo y ken no pa falta di espacio, algun medio Italiano a informa.

Segun un documento traha pa departamento regional di Proteccion Civil y publica pa corant Britanico, The Telegraph, “e criterionan pa acceso na terapia intensivo den casonan di  emergencia mester inclui edad di menos di 80 of un puntonan den indice di comorbilidad di Charlson -cu ta indica cuanto otro condicion medico e pashent tin- mester ta menos di 5”.

Nan tambe lo considera capacidad di e pashent pa recupera di un reanimacion. “E crecemento di e epidemia actual ta haci probable cu esaki lo alcance un punto di desekilibrio entre necesidadnan clinico di pashentnan cu COVID-19 y disponibilidad efectivo di recurso intensivo”, segun e documento, cu tambe a specifica cu den caso cu no ta posible proporciona na tur pashent servicio di cuido intensivo, lo ta necesario aplica criterionan pa accede na un tratamento intensivo, cu ta depende di recursonan limita disponible.

E documento ya ta prepara, wardando presentacion final y aprobacion di comite tecnico-cientifico prome cu esaki worde manda hospitalnan.

“Manera den guera, nos mester scoge ken pa salba”, docter Italiano specializa den anestesia y reanimacion, a revela desde hospital di Lombardia, region Italiano azota pa epidemia di coronavirus.

Criticonan di e maneho aki, a bisa cu esaki ta un eutanasia y cu docternan mester brinda servicio y haci tur cos posible pa scapa bida di pashentnan, sin importa nan edad y si nan tin condicion di salud previo.

Secretario di Salud di e region, Luigi Icardi, a sostene cu e protocol ta vinculante y lo establece den caso di saturacion di salanan “un codigo di precedencia pa acceso na cuido intensivo, basa den algun parameter manera potencial di sobrevivencia”.

“Nunca mi kier a yega na e momento aki”, e funcionario a bisa, debi na colapso di sistema di salud di e pais.

Segun e ultimo balance di Proteccion Civil, di diadomingo, 1.218 persona a morto di coronavirus na Lombardia, na unda tin un total di 13.272 caso. Italia ta e pais mas afecta di Europa, cu un total di 1.809 morto y casi 25.000 caso.