fbpx
December 08, 2022

Impacto di lockdown lo tin consecuencia catastrofico pa Aruba

Share on Facebook
Share on Whatsapp
0
0
Impacto di lockdown lo tin consecuencia catastrofico pa Aruba
Impacto di lockdown lo tin consecuencia catastrofico pa Aruba
Impacto di lockdown lo tin consecuencia catastrofico pa Aruba
Posted on 03/17/2020 7:28 pm AST | Updated on 03/17/2020 7:31 pm AST

ORANJESTAD – E impacto di e lockdown pa Aruba manera anuncia, lo ta “hopi tenso cu consecuencianan catastrofico pa nos turismo, economia, labor y finanzas publico”, asina minister di Turismo Dangui Oduber a indica na noticiacla.com diamars. E mandatario ta referi na e cantidad di aeroliña cu lo stop di ‘trece’ turista pa nos isla. Trece, pasobra e aeroliñanan lo sigui bula  (ferry in y sali cu pasahero) te ora logra saca tur nan pasaheronan for di Aruba.

AMERICAN AIRLINES

E sla mas duro, lo bin di p.e. American Airlines, cu ta stop di bula diadomingo awor te cu 6 di mei proximo. Pues esey ta traduci na 6 siman cancelando mas di 200 buelo di turista pa Aruba. E ta e unico aeroliña (te awor) cu a anuncia cu ta suspende su itinerario pa un periodo asina largo. E otro aeroliñanan no tabata asina ‘concreto’ y a bisa solamente cu nan lo suspende nan buelonan ‘te proximo aviso’. Pues no ta sigur si nan ta reanuda nan buelonan ora cu e lockdown vence (31 di maart 2020) of lo sigui e paso di American Airlines. 

SIGUI BULA

Mientras cu gobierno a anuncia e lockdown entrante 17 di maart 2020, mayoria di e aeroliñanan lo cuminsa para nan operacion completo for di diadomingo entrante. Di awor pa e fechanan en cuestion, nan lo ‘ferry in’ e buelonan (esta bula bin Aruba bashi). E ta varia pa cada aeroliña. Entre nan, United Airlines ta suspende su buelo dia 24 di maart te 3 di mei 2020. Delta lo cancela entrante 27 di maart te 1 di april 2020, y Jetblue a cancela tur su otro buelonan te 31 di maart 2020, aunke riba nan portal ta bisa cu ta cancela e buelonan pa Aruba ‘te proximo aviso’. Southwest su ultimo buelo ta 24 di maart 2020. WestJet ta cancela su buelonan dia 22 di maart 2020 pa un periodo di 30 dia, y SLM ta suspende su buelonan di 18 di maart 2020 te proximo aviso.  KLM y TUI lo sigui bula normal, aunke ta depende di e pasaheronan nan nacionalidad, ya cu no por bula cu e pasaheronan no residente pa 2 siman.  Aruba Airlines a suspende tur buelo pa y for di Aruba te proximo aviso. Avianca ta cancela buelonan di mainta entre maart 22 y april 30, 2020. E buelonan di atardi lo continua, aunke mester bisa cu e buelonan pa Colombia ta cancela. 

TRISTO Y FORZA

Riba pregunta di noticiacla, e mandatario di turismo a mustra cu e situacion “ta haci nos tristo pero na mes momento duna nos forza, curashi, energia y determinacion pa yuda e pais aki”. Ta conta cu e institucionnan financiero por yuda mitiga e situacion door di ofrece alivio financiero na nan clientenan cu lo keda afecta, y tambe di parti di gobierno, cu ta planea pa ofrece cierto pakete di estimulo. Loke ta sigur, e situacion den e proximo dos lunanan lo trece su retonan grandi. Y mientras cu Aruba lo por supera e virus y contene esaki, e efectonan economico nos lo sinti nan di un forma of otro.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.