COVID-19 ta un virus nobo, perteneciente na e famia di coronavirus cu a wordo detecta na China na december 2019 y cu ta afecta e sistema respiratorio (e por causa infeccion den pulmon) y despues di e area Asiatico ey, el a plama tur caminda, te cu awor aki a bira un pandemia, segun consehero medico di Departamento di Salud Publico, dr. Wilmer Salazar.
E virus aki ta di transmision via contacto cera, un persona cu tin infeccion ta niester, ta tosa of ta papia, e druppelnan infecta ey ta bay via nanishi, wowo y boca y despues e ta afecta e sistema respiratorio yegando te na pulmon.
Di e pulmon e por causa pneumonia cu por tin complicacion severo y cu lo por causa te hasta morto.
E transmision di e virus aki ta via contacto cera, un persona cu ta riba un distancia di 1 meter pa 1 meter y mey cu un otro cu ta infecta, den un superficie cu ta contamina ora cu un persona ta niester, ta cay memey di e superficie. Un otro persona cu ta sano ta mishi cu e superficie, ta pasa man na wowo, nanishi of boca y por keda infecta tambe.
Esey ta mas tanto e forma con e transmision di e virus aki lo por causa un malesa pa cualkier hende. Ademas di esey mester tene na cuenta cu e transmision ta dura entre 2 pa 14 dia di incubacion. Kiermen cu un persona, una bes cu e haya e infeccion, e no lo bay tin
sintoma durante e periodo ey. Despues di pasa e periodo aki e lo presenta sintoma.
