Manera a keda anuncia pa Gobierno di Aruba, nos pais a registra casonan di e Novel Corona Virus, conoci awor como COVID-19. Inmediatamente nos Prome Minister a decreta diferente protocol di higiena den cuadro di prevencion pa e virus aki sigui plama.
Como nos Compania Estatal di Transporte, Arubus NV ta comprometi na brinda su usuarionan e mihor calidad di servicio y siguridad ora di haci uzo di nos transporte. Den cuadro di esaki y mirando e situacion di pandemia di COVID-19 cu ta acaparando mundo henter, Director sr. Edwin Mohamed a delinea e siguiente plan di medidanan preventivo pa aplica den Arubus NV su operacion diario:
• Nos empleadonan ta debidamente informa di e sintomanan, maneranan di contagio y con pa desinfecta nan mes.
• Nos a aloca posters informativo na tur lugar di concentracion den nos compania y den nos busnan, pa asina nos empleadonan como tambe nos usuarionan ta debidamente informa.
• Medidanan di limpieza na nos oficina a keda reinforsa y ta haciendo esaki mas frecuentemente durante dia.
• Busnan di Arubus ta wordo desinfecta diariamente, 2 biaha pa dia.
• Nos ta ekipando nos busnan cu hand sanitizers cu e finalidad pa tur usuario desinfecta nan man prome cu haci uzo di nos servicio di transporte. Si no desinfecta man ora di subi bus, e chauffeur ta instrui pa prohibi e usuario di drenta.
• Nos chauffeurnan ta instrui pa prohibi usuarionan cu ta mustra di tin sintomanan di COVID-19 (keintura mas halto cu 38 grado, tos seco y dificultad pa hala rosea), pa subi nos busnan.
Segun e situacion di e COVID-19 sigui desaroya, gerencia di Arubus lo evalua eventual medidanan di prevencion mas estricto.
E ta den cada ken su man pa e COVID-19 no sigui plama na nos pais. Hunto nos por logra sali di e crisis aki door di aplica tur instruccion cu autoridadnan y expertonan certifica ta dunando nos.
