Alivio financiero na nan clientenan
ORANJESTAD (AAN): Caribbean Mercantile Bank (CMB) a haci un anuncio importante pa asina yuda alivia e situacion di nan clientenan den cuadro di e crisis mundial door di Coronavirus.
“Nos negoshinan local ta haya nan mes obliga pa tuma medidanan en conexion cu e Coronavirus (COVID-19), sea nan a cera of nan a manda empleadonan cas.
Nos di Caribbean Mercantile Bank ta haci nos maximo esfuerso pa contribui na brinda un alivio na nos clientenan.
Manera indica anteriormente, nos a activa nos “Plan di Continuidad di Negoshi” (Business Continuity Plan) y ya caba a anuncia algun medida operacional/interno pa sigui protega nos empleadonan contra e riesgonan di contrae e Coronavirus.
Naturalmente, bienestar di nos clientenan tambe ta prioridad y nos ta consciente cu diferente cliente personal y comercial lo bai pasa den temponan dificil cu menos entrada.
Pesey CMB como parti di MCB Group a tuma e siguiente decisionnan como prome paso:
ALIVIO FINANCIERO*
– Pa 3 luna (maart, april y mei) lo pone un moratorio riba prestamonan personal y comercial.
– Esaki kiermen cu pa e siguiente 3 luna, CMB lo suspende automaticamente pagonan riba prestamo personal, prestamo pa auto, prestamo di hipoteca personal. Pues no ta paga capital y tampoco interes; e interes lo wordo capitalisa riba e prestamo. Nos lo sigui evalua e situacion y caminda ta necesario lo haci ahustacion adicional.
– Pa prestamo comercial por fabor contacto bo account manager via email of telefon pa yega na un areglo pa cu e pagonan.
– Persona of negoshi cu mester di espacio financiero adicional por tuma contacto cu banco via email of telefon pa discuti un facilidad di credito temporal.
– Pa cualkier otro necesidad financiero, nos banco ta keda dispuesto pa evalua esaki individualmente.
Ordo pa transferencianan local y internacional cu wordo entrega personalmente na un sucursal prome cu 11:00 AM lo wordo procesa mesun dia.
Pa proteccion y seguridad di nan clientenan y conforme informacion di autoridadnan di salubridad, lo permiti solamente un cantidad limita di cliente pareu den cada sucursal.
Ta suplica nan cliente y bishitantenan pa por fabor sigui e instruccionnan di nan cuerpo di seguridad.
Ta pidi encarecidamente na nan clientenan pa haci mas uso posibel di nan servicionan electronico manera por ehempel Online Banking, Mobile Banking, Fuel Up pa yena gasolin y por haci pago cu bo Bancomatico Debit Card y tambe si mester usa machinenan di ATM.
“E ta nos compromiso cu nos lo sigui duna nos aporte, conseho y comparti nos miho pensamentonan con pa surpasa e temporada aki.
Den temponan dificil aki tambe nos kier a yama bo danki pa bo confiansa den nos banco”.
Keda pendiente di mas informacion di CMB riba nan website of medionan social.
*Prestamonan personal of comercial cu tin mas cu 90 dia di pago atrasa, NO ta bini na remarke.
