ORANJESTAD (AAN) – E hombernan A.C. (26) y A.M. (19) a presenta dilanti Hues pa e acusacionnan cu Fiscal a presenta contra nan. Nan ta wordo acusa di atraco cu violencia riba un homber, subsidiario maltrato y ladronicia di un cartera y un cellular.
A.M. tambe ta wordo acusa cu 5 September 2019, el a maltrata e dama W. Tambe e ta wordo acusa cu entre comienso Januari 2018 y 2019 e tabatin un brommer procedente di ladronicia.
ATRACO CU VIOLENCIA
A.C. a admiti di a dal e homber. Hues a bisa cu tin video di seguridad cu ta mira tur cos. A.M. a bisa cu ta berdad cu el a dal e homber M. Hues a puntra A.M. si el a bay cu e cartera. Segun A.M. e no a coy e cartera. Hues a mustra cu e victima a declara cu e tabata ocupa cu su cellular y un hoben a bay puntr’e pa placa. Ora el a bisa no, el a mira e hoben haci un señal y el a wordo ataca. A.M. a bisa cu esey no ta berdad.
Segun A.C. y A.M. ta door cu e homber M. a dal un dama di bida, nan a bay bati’e. Pero tambe nan a bay cu su cartera y cellular. Hues a puntra A.C. pakico el a bay cu e cartera di M. Segun A.C., e tabata burachi y a coy e cartera. Un otro persona S. a bisa cu el a coy e cellular. A.C. a bisa cu e slanan no tabata pa e atraco sino pasobra M. a dal un dama. Hues a bisa cu M. ta kere cu nan a bati’e pa hort’e.
Ta asina cu a reparti e placa cu a haya den e cartera. Hasta tabatin un discusion riba con a reparti e placa cu a haya den e cartera. A.M. a bia Hues cu e no a haya placa y no sa di e discusion. Segun A.C., el a reparti e placa cu dos otro homber pero no ta corda kende nan ta. El a bisa cu e no a duna placa na A.M.
MALTRATO
A.M. acusa di maltrato di e dama W. Segun A.M. e dama W. a hort’e y el a dal’e den su lomba.
BROMMER HORTA
Segun A.M. e no tabata sa mes cu e brommer Kawasaki tabata horta. El a cumpra e brommer for di un amigo D. pero D. no a bis’e cu e brommer tabata horta. Hues a bisa cu D. a bisa cu e no a bende brommer na A.M. A.M. a bisa Hues cu D. ta gaña.
Ta asina cu tanto A.C. como A.M. tin carchi di castigo.
EXIGENCIA DI FISCAL
Fiscal ta haya cu no por proba cu A.M. a cumpra brommer horta y a pidi Hues pa declar’e liber pa e acusacion ey. Fiscal si ta haya proba cu A.M. a maltrata e dama.
Fiscal ta haya A.C. y A.M. culpable di atraco cu violencia. E pregunta ta si tabata un plan haci of ta manera e sospechosonan ta bisa cu a maltrata homber pasobra cu el a maltrata un dama. Na opinion di Fiscal, e homber M. tabatin problema cu un dama pero esey a caba y despues A.C. y A.M. a atake.
Nan no por a splica pakico a bay cu e pertenencianan di M. y a reparti e placa. Fiscal ta haya cu aki por papia di un atraco cu violencia. El a exigi pa A.C. 1 aña di prison y pa A.M. 1 aña cu 2 siman di prison.
SENTENCIA
Hues despues di a scucha defensa di e abogadonan a sera tratamento di e caso y a dicta sentencia di biaha. Hues a bisa cu el a studia e caso bon y a scucha bon e defensa di e abogadonan. Hues a mustra cu A.C. y A.M. a bisa cu nan a bay dal e homber M. pasobra el a maltrata un muher di bida.
E pregunta ta cu si e maltrato tabata pa atraco. Hues no ta kere esey. Hues a bisa cu e ta kere cu aki ta trata di maltrato y despues ladronicia. Hues ta haya A.M. tambe culpable pasobra el a keda despues cu e cellular.
Tambe Hues ta haya A.M. culpable di a maltrata un dama. Hues a bisa cu e no ta haya proba cu A.M. a cumpra brommer horta. E tabatin e brommer 1 aña y no tabata sa cu esaki tabata horta. Hues a declara A.M. liber pa e brommer.
El a condena A.M. y A.C. na castigo di prison, igual na loke nan a sinta caba den KIA y cu e mesun dia nan ta wordo laga liber.
