*Consultant mericano a bay Merca bek
ORANJESTAD (AAN): E update cu Gobierno di Aruba di diahuebs mainta relaciona cu e situacion di Coronavirus ta mustra cu te na e momentonan aki tin un persona mas cu a resulta di ta un caso positivo.
Jurette Croes di Departamento di Salubridad Publico (DVG) a duna di conoce cu actualmente na Aruba tin 5 caso registra, pero un di e casonan aki, cual ta e pashent number un, e consultant mericano di 65 aña, esaki a bay Merca diaranzon.
Den e caso aki, e famia a manda busk’e cu Air Ambulance mirando cu ningun aerolinea kier a transporte.
E mericano, segun protocol, no tabata presenta ningun sintoma mas, pesey e por a bay Merca be. E ta recuperando.
CIFRANAN
Kiermen cu actualmente na Aruba tin 4 persona cu Coronavirus. Banda di esaki Croes a laga sa cu tin 61 caso negativo, 70 persona cu a wordo gestest y 127 den cuarentena na cas.
MEDIDANAN
Jurette Croes a haci referencia na tur e medidanan cu Gobierno a tuma diaranzon y cual ta cu tur establecimento mester sera 8:00 PM entrante diahuebs 19 di Maart. Prome tabata tin orario di ciere di 10:00 PM y awor a cambia esaki pa 8:00 PM. Esaki ta conta pa Aruba completo, a remarca. Pa tur bar y tur restaurant.
Mester evita aglomeracion di hende. Tin excepcion pa: botica na warda, restaurant solamente via drive true y delivery, nan por sera 10:00 PM.
Pompnan di gasoline por keda habri te cu 10:00 PM sirbiendo via di bentana. Gobierno ta urgi tur ciudadano pa tene bon cuenta e cambio aki y pa cumpli cu e reglanan pa asina yuda contene e virus pa e no plama.
Gobierno di Aruba tambe a anuncia cu entrante 19 di Maart tur Casino, teatro di pelicula, gym tin cu sera. Actividadnan deportivo den grupo tin cu stop di tuma lugar. Tur e actividadnan ta causa aglomeracion di hende y contacto entre hende, cual ta e fuente cu ta plama e virus.
Tur e medidanan aki ta vigente te cu 31 di Maart, e representante di DVG a indica.
