February 24, 2021

RAIZ ta bay uza crowdfunding pa financia su campaña

Share on facebook
Share on Facebook
Share on whatsapp
Share on Whatsapp
0
0
RAIZ ta bay uza crowdfunding pa financia su campaña
RAIZ ta bay uza crowdfunding pa financia su campaña

ORANJESTAD (AAN): Diabierna mainta partido RAIZ a tene un conferencia di prensa, unda cu Ursell Arends a duna un splicacion riba e manera con e partido ta bay financia su campaña politico.

“Pa pone fin na e sistema tradicional di financia campaña politico, caminda cu sponsornan ta pone influencia riba gobernacion, RAIZ ta distancia su mes di e forma tradicional y vulnerable aki”.

Awe nos ta anuncia nos campaña di crowdfunding, caminda cu nos ta bay colecta donacionnan den forma di sumanan chikito, pa asina nos financia nos campaña pa eleccion di 2021, segun Arends.

El a splica cu desde un inicio den statuut di RAIZ tin ancra con e partido via crowdfunding ta bay financia e campañanan.

“Tin un ley riba financiamento di partidonan politico cu a drenta na vigor, pero den nos bista tin algun buraco den e ley aki”.

E ley ta limita e cantidad di placa cu un empresa of persona por duna un partido, pero e ley no ta regula y controla fundraising manera rifa of barbecue, segun Arends.

El a sigui bisa cu asina e oportunidad tey toch pa un grupo chikito cumpra influencia cerca partidonan.

Arends a splica cu via e website di RAIZ, hendenan por contribui cu financiamento di nan campaña cu donacionnan di 5 te cu 1200 florin.

E sumanan ta menciona den statuut di e partido.

Segun e statuut RAIZ pa aña por ricibi te cu 1200 florin for di un persona of un compania.

“Como muestra di nos aprecio pa tur hende cu haci un donacion, nos lo ofrece nan un pin of moneda conmemorativo”, segun Arends.

Raymond Kamperveen tambe a hiba palabra durante e conferencia di prensa.

El a bisa cu ta importante pa ricibi contribucion di pueblo, pa RAIZ por sigui haci su trabao entre otro di informa pueblo di su trabaonan y plannan pa futuro.

“E moneda of pin di aprecio por bira un collector’s item, unda cu den futuro bo lo por bisa: mi a yuda RAIZ y nos a marca historia hunto”, segun Kamperveen.

El a sigui bisa cu e intencion ta pa e partido no mara su mes na ningun persona of sponsor.

 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.