February 24, 2021

Agente policial a tira un dama, kende a dicidi di manda auto riba Polis

Share on facebook
Share on Facebook
Share on whatsapp
Share on Whatsapp
0
0
Agente policial a tira un dama, kende a dicidi di manda auto riba Polis
Agente policial a tira un dama, kende a dicidi di manda auto riba Polis

Manera AWEMainta a publica caba riba su facebook, diabierna algo prome cu 10’or di anochi, Polis tabata persiguiendo un Kia Picanto blanco numera V-4404, maneha pa un dama aparentemente turista. E chauffeur di e auto aki tabata bayendo direccion pariba y a hit and run na rotonde Pos Chikito y despues na altura di Citgo Savaneta a bolbe hit and run y no a para.

E auto a sigui bay direccion San Nicolas y segun Polis, el a sigui dal varios auto riba e caminda, na altura di House of Cakes a dal frontal contra un autobus. Na dado momento entre House of Cakes y Club Arias, Polis a logra para e Kia Picanto. Nan a cera esaki y a pone a subi acera y bay pega contra un cura di waya. Den e impacto aki un meter di awa a wordo kibra. Algun persona cu ta biba eybanda lo a scucha como 5 tiro cay. Segun Polis e dama chauffeur lo a manda auto riba nan y esaki a pone cu nan lo a los tiro, den cual a e dama lo a ricibi un tiro y a keda herida.

Polis mesora a pidi refuerso di varios colega y tambe a pidi ambulance cu hopi urgencia. Mesora a cera caminda pa cuminsa cu un investigacion.  Tambe a pidi pa presencia di Departamento Tecnico di Polis, mirando cu varios tiro lo a cay y mester busca e hulsnan. E dama, kende aparentemente lo tabata bou influencia di un of otro substancia a wordo transporta pa hospital, mientras e caminda a keda cera pa Polis haci mas investigacion.

Vocero suplente di Polis, sra. Liliana Rasmijn, a manda e siguiente relato. E auto aki  a sigui bay direccion San Nicolas. Na altura di retonde FTA patruya di San Nicolas a topa cu e dicho auto. E patruya a dune e chauffeur señal pa para, pero ta keda nenga di cumpli cu esaki. A cuminsa un persecucion formal na unda e Kia Picanto a dal den diferente auto y despues dal frontal cu un autobus na altura di House of Cake Savaneta.

Ta dado momento a logra para e auto, pero e chauffeur femenino a cuminsa manda e auto dirigi riba Polis.  Polis lo mester a usa su arma reglamentario y a los tiro, pero asina mes e chauffeur femenino a sigui core e auto. Polis cu refuerso a logra para e dicho auto aki, pero aki ta unda cu e chauffeur femenino cu tabata bou influencia di un of otro substancia a resisti formalmente cu e agente policial siendo cu e ta herida. Agentenan a domina e situacion y ta logra deteni e persona femenino aki.

Mirando e situacion serio aki, e.o. a notifica Landsrecherche y Slachtofferhulp tambe a wordo poni na altura. E situacion di e chauffeur femenino ta stabiel y a wordo hiba hospital pa mas tratamento medico avansa.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.