Diasabra anochi den careda di 8:20, Polis ta pidi ambulance cu urgencia net dilanti Exito Supermarket, unda cu un motociclista a accidenta drentando e mondi na su banda drechi.
Informacion compila n’e sitio ta papia cu e Unidad Motorisa di Polis a duna e motociclista un stopteken den area di Wayaca, pero esaki lo no a sigui ordo di autoridad.
Un rato despues, segun Polis o sea e agente/nan motorisa lo a bin haya e bromer pega contra un pal’di kwihi y e motociclista herida benta banda di dje. Probablemente hendenan lo a mira kico a pasa y bisa Polisnan cu lo a sigui busca e bromer.
Manera nos a bisa anteriormente mesora a pidi ambulance p’e motociclista, kende tabata seriamente herida. Prome ambulance a yega y despues di un rato a yega di dos ambulance unda cu Paramediconan a baha pura y subi den e ambulance cu e victima aden.
N’e sitio por a scucha e motociclista sclamando dolor di lomba, bisando e Paramediconan esey pues e tabata na tino, pero seriamente herida.
Mesora a pidi Specialista di Trafico, Slachtofferhulp, y tambe BFTO (Departamento Tecnico).
Unda e accidente a sosode a pone lint pa despues cuminsa investigacion, y den careda di 10’or takelwagen a presenta pa bay cu e bromer sin number.
