February 26, 2021

Base financiero economico ta comparti importancia base enseñansa

Share on facebook
Share on Facebook
Share on whatsapp
Share on Whatsapp
0
0
Base financiero economico ta comparti importancia base enseñansa
Base financiero economico ta comparti importancia base enseñansa

E futuro di hobennan basa riba perspectiva economico y financiero

*E shete puntonan di accion di Ministro Asuntonan Economico y Financia

*Prome Ministro Wever-Croes ta baha gastonan oficina cu casi Dies Miyon

ORANJESTAD(AAN)–Pa Enseñansa por ta un vehiculo pa progreso,  mester tin un bon base financiero y economico pa generacionnan di presente y futuro.

E sistema educacional di un pais, ta mara na e placa cu un pais tin disponibel pa gasta na su comunidad riba tur tereno cu ta afecta e sector di enseñansa directamente.

Pa haya un bon bista kico e posibilidad pa progreso ta pa e generacionnan presente y di futuro di Aruba, mester analisa e maneho cu gobierno ta hiba y sigur e forma cu gobierno ta gasta placa of ta dirigi asuntonan financiero y economico.

Aruba prome cu Covid-19 a bati na porta, a conoce un situacion alarmante cu a pone futuro directamente na peliger.

E forma cu gobierno anterior di Mike Eman a atende cu placa di Aruba contra leynan cu ta dicidi con ta hiba maneho financiero di un pais, a haci cu Aruba a wordo manca dor di e debe nacional mara na e fondo di 1.6 Miljard cu a wordo gasta na un infrastructura na forma iresponsabel den cual sigur a lubida e prome metanan di infrastructura di un pais.

Hamas den historia di Aruba a malgasta placa manera a haci entre 2009 y 2017 cu  bati record den e problema cu el a ocasiona pa presente y futuro di Aruba, loke ta afecta enseñansa tambe.

Pa por papia di futuro di muchanan di Aruba, mester mira loke Gobierno ta prepara pa nan educacion na school cu ta depende grandemente di e situacion social di muchanan, cu a wordo seriamente afecta pa e pandemia di Covid-19.

Ya den e crisis causa pa gobierno anterior Mike Eman, manera rapportnan di instancianan oficial di Aruba y di Reino a proba, muchanan tabata den un problema serio pa loke ta trata nan futuro.

Cu Covid-19 futuro a conoce e reto di mas grandi pasobra cuponan di trabou na Aruba a cay y hopi cas di Aruba a conoce miseria manera den tempo moderno hamas Aruba a pensa di conoce.

Muchanan a haya nan problema cu school cera pero un cantidad enorme di mucha a haya nan mes den problema pa falta di placa di parti di nan mayornan, cu Gobierno Wever Cruz mester a atende pa medio di plannan social prome y despues cu Hulanda a duna yudansa, cu lo termina na 2021.

Con muchanan lo por gosa di un enseñansa manera ta wordo exigi den e plannan pa desaroyo sostenibel di Nacionnan Uni, ta sigur depende di e forma cu Gobierno Wever-Croes ta atende cu placa y economia.

Mientras Hulanda a mara Aruba na condicionnan pa haya e asistencia financiero necesario pa futuro, e actuacion di Gobierno Wever-Croes y su plannan concreto cu yudansa di organisacionnan mundial ta importante.

E maneho di Gobierno Wever-Croes ta wordo directamente ilustra pa e gastonan cu e mes ta haci pa entre otro su oficina. No por papia di un maneho financiero corecto si e Prome Ministro ta hiba un mal maneho cu su propio gastonan di gobernacion.

Cifranan ta indica cu Prome Ministro Wever- Croes a reduci e cantidad di personal na su Ministerio di Asuntonan General di 125 pa 22 cu ta nifica cu e ta scapa Aruba di un gasto di practicamente 10 Miyon compara cu e suma enorme cu Mike Eman como Prome Ministro tabata paga pa su Ministerio.

Kico Aruba por spera di e maneho financiero y economico ta bini dilanti den e shete puntonan cu e Ministro di Asuntonan Economico a presenta pa cumpli cu e Landspakket di Hulanda.

Den e puntonan aki ta resalta loke DIARIO semper a presenta como importante, cu ta e posibilidad pa control efectivo di parti di organonan di estado di Aruba riba e forma cu Gobierno ta gasta placa.

E gastonan di Aruba pa servicio y compra pa gobernacion ta baha mientras e Departamento di Financia ta sigui traha riba mas control.

Otro luna mester bira visibel con ta atende cu belasting indirecto mientras DIARIO ta sigui busca informacion riba leynan y procesonan cu mester wordo cambia.

Por tuma nota di proyectonan nobo, cu lo alivia e peso cu a wordo crea dor di Covid-19.

Na e momentonan aki, e forma cu gobierno ta uza placa di Pueblo ta conoce cambio compara cu un pasado den cual a fiesta cu placa di Pueblo y a stroba pa Aruba tin fondonan pa paga pa un sistema educacional pa muchanan, cu ta keda e base di futuro di e pais.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.