February 26, 2021

E luga di companianan di gobierno no por ta ni carni ni pisca

Share on facebook
Share on Facebook
Share on whatsapp
Share on Whatsapp
0
0
E luga di companianan di gobierno no por ta ni carni ni pisca
E luga di companianan di gobierno no por ta ni carni ni pisca

E busca pa e contesta di un caso legal na Merca den cunucu di Aruba

*Constitucion y Statuut ta presenta responsabilidad pa bienestar general

*E luga legal di pueblo como unico accionista di compania di gobierno

ORANJESTAD(AAN)–Siman pasa Merca a wordo confronta cu condicionnan pisa di clima. E tempo friu a causa morto entre otro di un mucha di 11 aña na e estado Mericano di Texas.

Fin di siman a bira conoci cu mama di e criatura, a dicidi di entrega un caso den Corte contra companianan cu mester percura pa electricidad na e luga cu e ta biba.

Mientras Aruba ta confronta un menasa di welga na WEB y e deseo di Gobierno pa trece un planta di gas pa produci energia na Aruba a bira tema di discusion, e responsabilidad pa bienestar general di Aruba y pa companianan di gobierno di Aruba, ta bira discutibel.

E situacion cu a surgi na Merca ta mustra cu un ciudadano por hiba un compania di  coriente Hues si e ciudadano por proba cu ta e compania di coriente no a percura pa tin ekipo cu ta evita cu e compania haya su mes den un situacion cu e no por entrega coriente.

Na momento cu e caso aki tabata wordo registra na Merca, na Aruba trahadonan di WEB ta menasa Aruba cu welga pasobra nan no kier adapta e salarionan cu Pueblo di Aruba ta paga nan pa haci nan trabou na WEB.

DIARIO a bay busca inspiracion den mondinan di Aruba y a confirma cu e problema grandi di companianan di gobierno ta, cu nan no ta ni carni ni pisca. Pasobra nan ta e caracter di un compania priva, e pensamento cu ta nan gerencia ta dicidi, ta wordo crea.

Ya Aruba conoce un problema serio cu su democracia pasobra a bira cu e gremionan tambe ta kere cu ta nan mester sinta riba stoel di gobierno cu Pueblo ta eligi den eleccion.

Gremionan por participa pero hamas por dicidi den un estado di derecho pasobra nan ta representa directamente nan sector y segun nan base legal nan mester defende e personanan cu ta paga nan pa defende nan interes.

E companianan di gobierno tampoco tin ultimo palabra den e sistema legal di politica na Aruba pa un simpel rason. E doño di e empresanan ta Aruba,  cu tin como representacion legal Parlamento di Aruba cu ta scoge su funcionarionan pa dicidi kico gobernacion di e pais ta encera.

Kico esaki ta nifica? Si nos busca inspiracion den naturalesa di Aruba nos ta mira cu tin diferente tipo di cadushi. Cada uno cu nan luga y nan diseño ora nan a wordo crea.

Gobernacion cu mester carga responsabilidad pa bienestar general di Aruba, tambe a wordo crea na nacemento di e estado di derecho y a bira nos bukinan di ley riba cual e Estado di Derecho di Aruba ta funda.

Kico esaki ta nifica? Segun nos leynan, nos base di Estado di Derecho riba cual Aruba mester funciona, e empresanan di gobierno tin un gerencia cu Gobierno mester nombra cu sosten di e mayoria di Parlamento.

Gobierno (cu debe responsabilidad na Parlamento como representacion directo di Pueblo), ta encarga cu e bienestar general di Aruba y mester dicidi con esaki ta presente den e maneho total cu ta wordo hiba na e companianan di Gobierno.

Gobierno di Aruba ta encarga cu e decisionnan cu mester wordo tuma pa bon funcionamento di WEB y tur otro compania di Gobierno, cu finalmente ta responsabilidad di Pueblo.

Kico ta pasa si manera na Merca, un persona mester entrega un keho contra WEB pasobra durante un blackout el a sufri un accidente?

Nos cuadro di leynan ta mustra cu si e persona por proba esaki, ta mas cu normal cu Husticia ta permiti pa e haya un compensacion di parti di e compania responsabel pa e blackout.

Pero no ta e gerencia ni personal di compania di gobierno ta paga for di nan saco, pero ta pueblo ta pone e placa riba mesa for di fondonan di Pueblo, cu gobierno mester maneha a base di nos leynan manera e Ley di Contabilidad.

Ta di lamenta cu necesidad di un pueblo den tempo di pandemia por bira motibo pa un caso den Corte. Pero segun nos leynan, no ta emocion pero ley ta conta.

Ley ta papia un palabra cla! Den emergencia Gobierno ta percura pa e bienestar general di tur hende y no solamente di un gremio of di un empresa di gobierno cu no ta empresa cu un doño priva, pero un empresa di Pueblo di Aruba cu ta paga WEB entre otro pa sirbi bienestar general (di tur hende) na Aruba.

 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.