February 26, 2021

Vacunacion contra Covid-19 pa 60 plussers  a inicia dialuna na Teresita Center

Share on facebook
Share on Facebook
Share on whatsapp
Share on Whatsapp
0
0
Vacunacion contra Covid-19 pa 60 plussers  a inicia dialuna na Teresita Center
Vacunacion contra Covid-19 pa 60 plussers  a inicia dialuna na Teresita Center

Prome Minister: “Esaki ta e prome paso real pa reconstrui Aruba”

ORANJESTAD (AAN)—Dialuna mainta gobierno a cuminza, den e Distrito di San Nicolas, cu e plan di vacunacion relaciona cu Covid-19, y den e ocasion aki personanan di 60 aña y mas a haya nan prome dosis, na Teresita Center, den presencia di Prome Minister mr. Evelyn Wever-Croes y Minister di Salud Dangui Oduber.

Minister Presidente a hiba palabra y a splica cu for di siman pasa caba, Diamars, asina e vacunanan a yega Aruba, e proceso a inicia cu e personal cu ta traha den cuido, pa asina tin e profesionalnan sigura pa nan por sigui cu e trabao.

E mandatario a expresa cu Dialuna a cuminza cu e grupo cu realmente, gobierno kier proteha cu ta e personanan di 60 aña. Esaki pasobra e cifranan average di pacientnan covid-19 positivo cu ta wordo tuma na hospital, nan edad average ta 63 aña.

Esey kiermen cu e grupo aki ta esnan cu e virus ta dal mas duro, te cu nan tin cu bay hospital pa nan haya cuido. “Pesey nos kier cuminza na proteha e grupo aki pa evita cu Covid afecta nan asina tanto y evita cu nan mester bay Hospital”, Minister Presidente a bisa.

E mandatario a referi na e personanan cu a fayece door di Covid-19 na Aruba, y a splica cu ora di wak kico mas nan tabata tin apart di e virus, a constata cu personanan cu problema di curazon ta e grupo di mas grandi, sigui pa esnan cu tin problema di riñon, personanan cu ta sufri di hipertension, obesidad, diabetes.

Pacientnan cu e malesanan aki, combina cu Covid-19, ta esnan cu ta causando mas di e fayecimento relaciona cu e virus, aki na Aruba.

“E gruponan aki ta esun cu gobierno kier cuida, y cu ta considera e gruponan vulnerable”, e dignatario a agrega.

Minister Presidente a subraya cu e dia aki ta hopi importante, pasobra for di 13 di Maart, cu Covid-19 a bati na Aruba su porta, loke e tabata kier ta pa evita pa e virus aki haci e hendenan hopi malo, y hasta cu por a evita cu fayecimentonan.

“Y awe nos ta asina leu. Diesun luna despues. Y cu e vacunacion aki, claro e no ta kita bo di haya covid. E no ta proteha bo pa no haya covid nunca mas, pero si bo haye bo no ta bira hopi malo di dje y hustamente ta esey nos ta buscando”, Minister Presidente a menciona.

El a reitera cu e dia aki ta hopi importante den full e bataya aki cu Aruba ta hibando, indicando cu esaki ta e prome paso real pa reconstrui nos pais.

“Cu nos grupo vulnerable proteha, nos por cuminza flexibiliza nos medidanan y reconstrui nos pais realmente”, Prome Minister a remarca.

 

 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.