fbpx
April 16, 2021

Alan Howell ta sospecha cu ta placa di voorschot saca di e fondo a causa ta e causa

Share on facebook
Share on Facebook
Share on whatsapp
Share on Whatsapp
0
0
Alan Howell ta sospecha cu ta placa di voorschot saca di e fondo a causa ta e causa
Alan Howell ta sospecha cu ta placa di voorschot saca di e fondo a causa ta e causa

ORANJESTAD (AAN): Diamars mainta dilanti sede di Partido POR na San Nicolas, e lider Alan Howell a duna su banda di medaya con Gobierno a cay.

   El a bisa cu Diamars siman pasa el a haya un carta di Landsrecherche splicando cu ta bay haci un investigacion riba e fondo di fraccion di POR, y tambe ta pone beslag riba un cuenta bancario personal di Howell. 

   Den e carta no ta skirbi ningun caminda kico e caso ta, y ni pakico.  Pero djis a indica cu e ta pa haci un investigacion, y no ta menciona nada encuanto sospechoso, etc.

   Como Polis, e sa cu ta bien posible cu bo por tuma algo den beslag sin cu necesariamente tin un sospechoso riba dje.

   “E tabata un shock grandi pa hayami den e situacion aki, y te awe eigenlijk mi no sa de que se trata e caso,” Howell a bisa.  Ta den prensa el a bin haya extra detaye.

   Ora el a haya e carta, el a bay trabao y a bin ta ricibi varios Whatsapp di su siguidornan cu ta mustra riba e asunto.  El a bay check y e ora el a mira cu un comunicado a sali di Ministerio Publico splicando kico ta pasando cune specificamente.

   “Ora mi a mira e comunicado, e tabata bastante diferente cu e carta cu ami mes a haya personalmente,” e lider di POR a bisa.

   Despues rapidamente el a haya yamada telefonico di Prome Ministro, pa puntre kico ta pasando exactamente.  Howell a bisa cu e mes no sa mucho di esey, pero a bisa si cu Ministerio Publico a pone beslag riba cuenta di e fundacion, y cuenta personal di banco, y mas no a wordo bisa.

   “Ministro Presidente a contestami, cu ta cu bo mes nan tine anto, y mi a conteste aparentemente,” Howell a indica.  Aki Premier a bise, “mi sa suficiente” y e yamada a finaliza.   Un rato despues ta Ministro di Husticia a yama cu pregunta similar.

   Den menos di 10 minuut e ta haya mensahe di sostenedornan cu a bise cu “Gobierno a cay”, y el a contesta “ta imposible”.  Nan a bise cu Gobierno a cay pa su via.

   Aki Howell a contesta e persona, “Pa via di mi?  Ki mishi Gobierno cay pa via di mi?”

   E no ta compronde pakico no a yama un reunion cu e tres lidernan di coalicion prome.  E no a haya chens ni pa splica kico e por ta.  Pero Gobierno si a core bay tuma retiro.

   Na opinion di Howell, Gobierno a hunga un rol pa tuma retiro y tira culpa riba dje.  “Mi sa masha bon cu di hopi dia caba Prome Ministro kier laga Gobierno cay,” el a bisa.  “Mi sa masha bon tambe cu tin hopi responsabilidad cu kizas uno kier laba man di dje, y mi no ta kere ta husto pa malusa un momento pa tira Gobierno abao riba nomber di Alan Howell, pa asina laga e pais sin Gobierno legitimo.”

   Howell no ta compronde tampoco con rapidamente Andin Bikker y Dellanire Maduro a bula afo di POR.   Pero el a agrega cu e tabata ocupa ta trahando lista caba pa eleccion di September 2021 riba cual no tin Andin ni tampoco Dellanire agrega.

   “Pasobra di algun tempo atras caba, nan a lagami sa cu nan no tin interes di forma parti di POR mas y cu nan lo no bay eleccion venidero cu POR,” Howell a divulga.

   Howell ta kere cu e carta di Ministerio Publico ta un show. 

   Encuanto e asunto di placa di fondo di fraccion, ta conoci cu tur luna e fraccionnan ta haya placa for di Finanzas.  E fraccion di POR ta chikito, pues por haci mucho mas cos util compara cu otro fraccion cu ta mas grandi.

   Tur luna ta haya 15.000 Florin na disposicion di e fraccion pa wordo usa.  Segun Howell door di haci cierto transaccion, esaki a crea un MOT Melding. 

   Si acaso a mira Howell ta haci cierto transaccion dudoso, di con no a bay puntre kico ta pasando?  Lo tabata facil pa tesorero habri e bukinan y mustra con tur cos ta netchi poni den buki, unda cada cent cu a bin di Finanzas a bay.

   Si tin cualkier transaccion cu a bay di e Fondo pa cuenta personal di Alan Howell, ta unico manera pasobra ya caba prome mi a duna e tarea, mi a duna un voorschot caba pa haci e trabao, y despues cu presenta e invoice na tesorero, e ta debolbe e placa bek.

   Pues e ta cuminza pusha e idea den direccion cu ta djis un adelanto (‘voorschot’) lo a causa un redflag na MOT y cu a pone Gobierno cay.

 

Share on facebook
Share on Facebook
Share on whatsapp
Share on Whatsapp
0
0

Tuma parti na e prome edicion di Encuesta pa Eleccion 2021.

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.