fbpx
April 16, 2021

Fraccionnan hunto ta ricibi 672 mil florin tur aña pa trabao Parlamentario; No tin claridad kico e inversion aki a produci

Share on facebook
Share on Facebook
Share on whatsapp
Share on Whatsapp
0
0
Fraccionnan hunto ta ricibi 672 mil florin tur aña pa trabao Parlamentario; No tin claridad kico e inversion aki a produci
Fraccionnan hunto ta ricibi 672 mil florin tur aña pa trabao Parlamentario; No tin claridad kico e inversion aki a produci

Dos trahador pa cada fraccion mas 10 mil florin pa aña pa cada asiento cu tin den Parlamento. Esey ta locual tur fraccion den Parlamento di Aruba ta ricibi. E caso di Alan Howell, lider di fraccion di POR y ademas Presidente di e fundacion di fraccion di POR, a lanta hopi pregunta riba e sistema aki.

Ta trata di un areglo cu a inicia na 2010, unda a dicidi cu fraccionnan den Parlamento lo haya sosten pa nan trabaou, den forma di placa y tambe trahador, cu ta conoci como e Regeling Ondersteuning Fracties in de Staten.

Segun e areglo nobo, cu a pasa Parlamento dia 7 di December 2018, cada persona elegi cu ta di un partido, ta forma parti di un fraccion. Si ta un persona di un partido so a saca asiento, e persona ey ta un fraccion tambe. E areglo ta bisa cu cada fraccion tin derecho riba contribucion cu ta bay riba presupuesto di Parlamento, pa asina promove funcionamento di e fraccionnan.

Sosten financiero pa duracion di periodo di Parlamento

E contribucion manera ta describi, ta pasa pa un fundacion cu ta lanta pa e fraccion, di tal forma cu por duna servicio na e fraccion. E acuerdo di servicio ta pa e duracion di Parlamento, te na maximo tres luna despues cu Staten nobo keda huramenta. E dos trahadornan cu ta sostene e fraccionnan ta haya pago na nivel di ambtenaar. Unavez cu e fraccion stop di existi, e derecho pa ricibi contribucion tambe ta caba.

E suma cu ta ricibi ta pa cubri gasto di (otro) personal y material, y pa promove funcionamento di e fraccion, pa por ehecuta actividadnan necesario y paga esaki. No por usa e fondonan pa paga pa gastonan cu Parlamentarionan ya cu ta haya compensacion pa esey caba.

E gasto pa lanta un fundacion ta cubri pa Parlamento, y e directiva di e fundacion di fraccion aki ta duna Presidente di Parlamento tur aña, prome cu 31 di Augustus, un cuenta anual cu ta prepara pa un Register Accountant of un consulent di administracion. Si un fraccion stop di existi, Presidente di Parlamento mester ricibi e cuenta anual pa mas tarda cu cuatro luna despues cu esaki sucede.

Mehoracion produccion di fraccion

Segun splicacion di e areglo, articulo 2 ta determina e forma di pago y e suma, unda ta traspasa e fondonan pa e fundacion cu e fraccion ta lanta pa duracion di e servicio. E prome areglo di 2010 tabata uno cu tabata pa un duracion di un aña y mester a renoba esaki tur aña, algo cu segun Parlamento, no tabata efectivo. Como tal a dicidi pa haci e areglo uno basa riba e duracion di e Parlamento.

E formulacion ta basa riba e areglo similar na Hulanda, cu ta Regeling Financiele Ondersteuning Fracties in de Tweede Kamer di 2014, baoconsideracion cu Aruba na 2018/2019 ainda no tabatin e ley Financiamento Partidonan Politico.

E contribucion na fraccionnan ta pa mehora funcionamento di e fraccion, cu ta permiti pa busca mas personal, paga expertonan pa periodo cortico y ehecuta investigacionnan propio.

Mirando cu un fraccion por stop di existi, e contratonan laboral cu e fundacion di un fraccion asina ta cera, ta cay bao di un areglo di un ley special, esta cu no ta crea un relacion di labor duradero, aunke cu directiva di e fundacion mester tene cuenta cu aspectonan di ley laboral. E empleado mester ta informa di e inseguridad di e duracion di su salario.

AVP ta ricibi e suma mas halto

E areglo aki ta nifica cu fraccion di AVP ta ricibi 90 mil florin pa aña mas dos trahador di fraccion (fractiemedewerkers) cu ta gana un salario na nivel di schaal 9, aña di servicio 5, cu ta representa 4.900 florin pa luna. Tur fraccion ta ricibi e sosten di 118 mil florin pa aña den forma di e dos trahadornan, mas 10 mil florin pa asiento pa aña. Fraccion di AVP como tal ta ricibi e suma mas halto cu ta 118 mil mas 90 mil, cu ta 208 mil florin pa aña en total pa su trabao den Parlamento, sigui pa MEP cu ta ricibi 198 mil florin, cu ta inclui e salarionan di e dos fraktiemedewerker. MEP a perde 10 mil florin pa motibo cu Daphne Lejuez a bira independiente. Di otro banda, Lejuez cu ta independiente no ta ricibi ningun sosten, ni di trahador ni cu finanzas. Fraccion di POR ta ricibi 138 mil florin pa sosten y RED 128 mil florin pa aña.

Pregunta na lidernan di fraccion

Bon Dia Aruba a manda e mesun preguntanan pa lidernan di tur tres fraccion den Parlamento cu no a mishi cu e tema di e fundacion y e subsidio cu ta ricibi. Tanto Marlon Sneek di AVP, Rocco Tjon di MEP y Ricardo Croes di RED a haya e preguntanan con nan fraccion ta usa e 10 mil florin pa asiento, y con e ta yuda e trabaoparlamentario? Kico ta e trabao di e dos fractiemedewerkernan, y kico ta e produccion di e trabao den e ultimo cuatro añanan aki. Tambe Bon Dia Aruba a puntra pa e cuentanan anual. Te na ciere di nos edicion, no a ricibi ningun reaccion di e tres lidernan di fraccion menciona.

Fundacion di fraccion ta keda existi

Banda di e pregunta pakico mester a involucra otro persona legal den e trabao di e partido politico, ta surgi e pregunta pakico e fundacion mester haya fondo di e partido pa administra. E ley Hulandes cu a sirbi como modelo (parcialmente) no conoce e forma aki. E partido politico ta haya subsidio y ta duna cuenta via su cuenta anual.

Otro pregunta ta con ta haci ora un fraccion no ta existi mas, un situacion cu e areglo mes ta menciona como problematico. Sin embargo, ta trata solamente e asunto di con pa termina e contratonan laboral cu e colaboradornan, mientras no ta atende e asunto di e fundacion, como persona legal mes. Ta trata di un persona legal cu ta keda existi y e pregunta ta bou ken su control e fundacion aki ta keda funcciona. E preguntanan cu Bon Dia Aruba tin ta si lo no tabata mas simple pa duna e partido politico e placa y laga nan duna cuenta via nan cuenta anual? Ademas, e fundacion cu ta lanta cu e meta pa transferi placa pa e fraccion di e partido, unda e fraccion ademas no tin personeria huridico y por lo tanto no por firma un contrato, ta keda opera como kico? Esakinan tambe ta bira un di e fundacionnan riba cual no tin un debido supervision financiero?

Bon Dia Aruba ta spera di por haya un splicacion mas amplio riba e aspectonan aki.

Share on facebook
Share on Facebook
Share on whatsapp
Share on Whatsapp
0
0

Tuma parti na e prome edicion di Encuesta pa Eleccion 2021.

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.