ORANEJSTAD (AAN): Manera cu DIARIO a anuncia luna pasa caba, e Beatificaciond i Dr. Jose Gregorio Hernandez lo ta fin di el una aki.
Fundacion Venerable Jose Gregorio Hernandez ta preparando pa celebra beatificacion di dr. Jose Gregorio Hernandez.
Recientemente, nos a ricibi e grato noticia cu nos tabata spera pa dies luna largo caba y nos sa cu tur e devotonan tin un alegria inmenso.
Cu esaki Fundacion Venerable Jose Gregorio Hernandez, ta participa cu S.S. Papa Francisco a pone e fecha di 30 di april 2021 pa e dokter Venezolano worde declara “Beato Jose Gregorio Hernandez”.
Segun Monseigneur Baltazar Porras, beatificacion di dr. Jose Gregorio Hernandez a yega na un momento hopi oportuno door di e pandemia.
Tempo e dokter tabata na bida, el a yuda hopi enfermo den 1917, e aña cu Griep Spaño a cuminsa, mientras e mes a fayece dia 29 di juni 1919.
E intencion ta, pa e ceremonia di su beatificacion tuma luga den e stadion di Universidad Central di Caracas, na unda e dokter a studia y gradua, pero door di e pandemia, pastoor Geraldino Barachino di e parokia La Candelaria a informa cu e celebracion di e beatificacion lo tuma luga na Colegio La Salle na e colina di Caracas. E ta un luga cu por carga hopi hende.
Dia 26 di october lo ta dia su fiesta, esey ta su fecha di nacemento. Papa Francisco a duna autorisacion pa e fecha aki. Normalmente e dia di cada santo of beato ta riba e fecha cu el a fayece. Dr. Jose Gregorio Hernandez a fayece dia 29 di juni, pero e dia ey, ya iglesia ta celebra fiesta di San Pedro y San Pablo.
Di e forma aki, nos fundacion ta avisa pueblo di Aruba, especialmente nos devotonan, cu nos ta bay tin tres dia di alabansa y ofrecimento di bela, esta diaranson 28 di april, diahuebs 29 di april y diabierna 30 di april pa 7 pm. Diasabra 1 di mei pa 10 am, nos ta bay tin un santo sacrificio di misa pa gradicimento. Tur tres dia di alabansa y ofrecimento di bela y e santa misa lo tuma luga na Sitio di Oracion mes, situa na Tanki Leendert 128. Laga nos pidi Nos Tata Celestial cu Covid-19 por calma, pa asina nos por celebra e beatificacion aki sin pone ningun hende na peliger.
