fbpx
April 16, 2021

Dia 27 di april YMCA lo cumpli su di 65 aña di existencia

Share on facebook
Share on Facebook
Share on whatsapp
Share on Whatsapp
0
0
Dia 27 di april YMCA lo cumpli su di 65 aña di existencia
Dia 27 di april YMCA lo cumpli su di 65 aña di existencia

ORANJESTAD (AAN): Pa 65 aña caba Young Men’s Christian Association (YMCA) ta formando parti di e comunidad di Aruba, ofreciendo personanan di tur edad un espacio unda nan por ta nan mes, sin importa e rasa, genero, religion of cultura di un persona.

Pa hopi aña YMCA ta conoci pa ofrece diferente tipo di curso, organisa vakantiekamp pa nos muchanan y hubentud y tambe YMCA ta ofrece un programa di traimerdia (Y’s Care) pa muchanan entre 4 pa 17 aña. Lamentablemente, COVID-19 tabata tin un impacto grandi riba nan organisacion, actividad y finansanan. Nan trahadornan usual mester a stop, mientras cu e gastonan a keda halto.

For di un comienso a implementa diferente medida pa nos organizacion por keda funciona, pero financieramente e ta keda un reto inmenso. A pesar di e circumstancianan aki, cu YMCA a haya nan mes den un situacion hopi dificil, nan a sigui cu nan proposito pa ta un centro di sosten pa comunidad.

YMCA hunto cu CEDE Aruba y Rode Kruis Aruba a uni man y ta formando parti di e proyecto ‘Meals on Wheels’, cu a cuminsa for di 20 di april 2020 y cu ainda ta activo. E cushina na YMCA San Nicolas ta operando 7 dia pa siman, cu ayudo di personal y boluntarionan for di CEDE, preparando 200 cuminda pa dia cu despues Rode Kruis ta distribui rond di nos isla na e personanan menos afortuna. Nan ta sumamente orguyoso y ta sinti honra di ainda por forma parti di e proyecto y di e manera aki yuda nos comunidad.

YMCA a pidi ayudo di e publico en general. Durante hopi aña nan a conta cu sosten di pueblo y awo mas cu nunca nan mester di dje. Nan ta conciente cu e situacion no ta facil pa ningun hende, pero cualkier ayudo ta sumamente balora. Dia 27 di april YMCA lo ta cumpliendo su di 65 aña di existencia y nan lo aprecia sinceramente cualkier ayudo cu nan por haya di nos pueblo. Sostene YMCA pa asina YMCA por sigui sostene nos comunidad.

Share on facebook
Share on Facebook
Share on whatsapp
Share on Whatsapp
0
0

Tuma parti na e prome edicion di Encuesta pa Eleccion 2021.

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.