ORANJESTAD (AAN): Darlaine Guedez-Erasmus kende ta Parlamentario pa MEP, a indica cu mirando cu mas di un aña di e pandemia a pasa, nos por mira cu na Aruba y rond di mundo, lamentablemente hopi hende a perde nan entrada y hogarnan a keda sin finanzas y sin por cubri gastonan.
E crisis pisa aki a toca na porta di cada famia y ta influencia nos estado di salud y financiero.
Pa loke ta e parti financiero, gobierno cu e prestamo di hulanda ta haci su maximo esfuerso pa nos tur como pueblo sobrepasa e crisis aki. Banda di esey, tin di nos cu a entrega 25%, 20%, 12.6% of 4.5% di nos salario pa contribui cu fase. Di e manera ey nos ta solidario cu esnan cu a perde entrada. 11.783 persona a haci uzo di FASE. Cual a suma na 50 miyon Florin te na februari 2021.
Aruba a brinda un man na personanan y nan famia cu ta pasando mas dificil den e momentonan aki. Covid-19 ta un crisis serio cu ta afecta cada un di nos, pero di un cos mi ta sigur cu hunto nos lo vence, manera Aruba ya den pasado a haci caba.
Cada un di nos por haci un diferencia y ta di ayudo pa un otro, e no ta tuma hopi, di e tiki cu nos tin nos por duna na un otro cu tin menos, ya nos ta yudando nos prohimo y contribui pa nos hiba nos Aruba padilanti.
