fbpx
May 06, 2021

Ta apela na sano huicio di lidernan politico pa cumpli cu regla di eleccion 2021

Share on facebook
Share on Facebook
Share on whatsapp
Share on Whatsapp
0
0
Ta apela na sano huicio di lidernan politico pa cumpli cu regla di eleccion 2021
Ta apela na sano huicio di lidernan politico pa cumpli cu regla di eleccion 2021


Comite Electoral a yama un reunion virtual cu media local pa comparti informacion y detayenan di con entrega di lista y eleccion lo sosode e aña aki. Den esaki, e vice president di e Comite Electoral Sharin Luydens a duna su presentacion durante termino di un ora, cual a inclui sesion di pregunta di parti di prensa. E puntonan mas importante cu a bin dilanti ta lo siguiente:  

Partidonan cu a reuni recientemente cu Crisisteam a haya un carta for di Comite Electoral caminda ta indica riba con e proceso pa entrega di lista lo cana na e ocasion aki. Ta asina cu no lo permiti aglomeracion di ningun tipo. Y aunke esey no lo ta controla door di Comite Electoral, Luydens ta apela na sano huicio di cada organisacion politico participando den e eleccion. Cada partido tin e opcion pa entrega nan lista di forma digital a traves di un email, of tambe por haci un afspraak durante ora di oficina pa entrega esaki personalmente na e Comite Electoral. E entrega ey ta door di 1 delegado so di e partido.

Ora di votacion e buzon ta scan di biaha e biyete ora cu votado ta hinca esaki den dje. E sistema ta scan di biaha na unda e votado a marca e bala cora. Den caso cu tin dos bala cora, por ehempel, e sistema ta bay conta e vota e como invalido. E sistema cu Pais Aruba a contrata pa haci uzo di dje den eleccion ta di e compania Canades Dominion. Si e nomber ta zona bo, ta pasobra esaki ta e mesun compania cu tabata encarga cu e eleccion na Merca aña pasa.

Pa 7’or, ora cu e urna cera, e president di e mesa solamente mester primi riba e tablet, y den un seconde e sistema lo saca e resultado pa partido y pa candidato di biaha. Comite Electoral ta spera cu entre 8’or pa 8:30 tur resultado lo ta conoci caba. Despues cu e urna a manda e resultado di e sistema, e miembronan di e mesa ta pasa pa haci e conteo manual cu tur tempo y sin pura, cu ta ratifica of ahusta e resultado digital. Lo bay sortia e biyetenan di votacion segun partido. Lo tin presencia di un agente policial na cada urna durante henter e dia di eleccion pa realisa e mantencion di ordo publico y reglanan vigente.

E cantidad di urna pa e eleccion di e aña’ki a aumenta. Na 2009 tabatin 59 urna. Na 2017 tabatin 62 urna mas dos Bijzondere Stembureau, esta A (KIA y Hospital) y B (Casnan di Anciano). Pa 2021 ta bay tin 70 urna mas dos Bijzonder Stembureau (A y B) y un Brief Stembureau pa esunnan cu ta den isolacion door di Covid.

E ultimo aki ta algo cu Comite Electoral a bin cune despues di a tuma nota di loke a sosode na Corsou caminda tabatin hendenan den isolacion cu toch a bay vota y a crea un cluster di contagio na diferente luga di e isla. Di otro banda mester  tene cuenta cu e persona, maske ta den isolacion, tin derecho di eherce su voto, mescos cu esunnan den KIA of na Hospital ta hacie.

E motibo pakico ta aumenta na 70 urna ta cu, principalmente den districto di Noord, e poblacion a crece exponencialmente. Ora cu a bay reparti e adresnan, a nota cu tabatin entre 1.200 pa 1.400 votado pa cada urna, cu ta loke no ta desea di tin, specialmente den relacion cu e pandemia. Esaki ta pone cu hopi hende no lo bay vota e biaha aki na e mesun caminda cu semper nan a vota. Tin hende cu a cambia di urna y Comite Electoral ta pidi comprension pa esaki. No ta bay cambia persona di urna.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.