Fiscal a baha pisa riba trio exigiendo entre 60 y 66 luna di prison pa e trio
ORANJESTAD (AAN) – Un ex militar Venezolano, R.B.E., kende tabata trahando pa gobierno Maduro ayera a scucha Fiscal exigi 66 luna di prison. Fiscal ta haya R.B.E., e Venezolano W.V.R. y e Colombiano biba na Aruba A.G.J. culpable di a haci un asalto arma na un cas na San Nicolas. Ayera mainta tur tres sospechoso a presenta den sala di Corte di Husticia.
Fiscal a acusa W.V.R., R.B.E. y A.G.J. cu riba 9 November 2020 a haci asalto arma riba e dama A. Tambe Fiscal a acusa R.B.E. di posecion di un revolver riba 28 November 2020.
MENAZA POLIS
R.B.E. tambe ta wordo acusa di a menaza dos agente di Polis cu morto riba 15 December 2020. E lo a bisa cu lo bin cu 15 granada di man y mata nan un pa un. Un di e agentenan a declara cu ora e tabata cana banda di e celnan na warda di Polis, Santa Cruz, R.B.E. a bisa cu si a yega di mata Polis na Aruba. Despues el a bisa cu e lo bin cu 15 granada di man. R.B.E. den Corte a desmenti di a menaza e agente di Polis y a bisa Hues cu e otro presonan lo a menaza Polis pasobra nan no a haya awa.
MALTRATO
Fiscal a bisa cu A.G.J. tambe ta wordo acusa cu riba 30 Juni 2020, el a maltrata dos persona, su ex amiga cu su amigo. Ademas A.G.J. ta wordo acusa cu riba 17 Juni 2020 a destrui un auto y a menaza dos persona cu pegamento di candela y morto. Den Corte A.G.J. a admiti di a maltrata hende y destrui auto. El a bisa cu tabata su ex amiga C. y cos a bay for di man.
Hues a puntra W.V.R. riba e asalto arma y el a admiti.
R.B.E. a desmenti di a haci e asalto. El a bisa cu el a bay busca placa cu hende debe y nan a dun’e un revolver cu no tabatin bala como pago. El a bisa Hues cu Polis a maltrat’e pa declara contra A.G.J. El a bisa cu nan kier a force duna declaracion y firma documento pero el a nenga.
A.G.J. tambe a desmenti. El a bisa Hues cu e no conoce nan y cu nan ta gaña riba nan.
ASALTO ARMA
Hues a bisa cu e dama A. a bisa cu 6 homber a drenta su cas na San Nicolas, pidi pa placa. Tres di nan tabata arma y tabata papia Spaño. E tabata cu su yiu y nan a bent’e abao, pone paña na su cara y yiu. Nan a bay cu diferente articulo, joyas, boternan di bebida, for di cas.
PERSECUSION DI POLIS
Un bisiña a wak un auto y a corda e plachi di number. El a bisa Polis e plachi number. A base di esaki a haci investigacion y Polis a topa e auto tabata core den direccion contrario. Polis a duna e chofer señal pa para. El a para pero despues a sigui core.
A cuminsa un persecusion, pero na dado momento e auto a para y dos homber a sali core bay na pia. Den e auto a haya placa, mascara preto, algun boter di bebida alcoholico. A resulta cu e auto tabata gehuur y e plachi di number un persona a haci denuncia di ladronicia di plachi number.
DETENCIONNAN A CAY
Polis a interoga e dama Z. cu a huur auto. El a bisa cu e ta sospecha, Bryan, Jeffrey y un tal Maracucho lo a haci e asalto y cu Bryan y Jeffrey a huy bay Colombiano. Despues el a declara cu su ex amigo Bryan cu a huy bay Colombia a bisa cu nan a haci e asalto y con a reparti loke nan a haya.
A base di investigacion, Polis a detene W.V.R. y el a bisa cu e idea a bin di e Arubiano A.G.J. y cu ta e Arubiano a core e auto. Na un cas na Piedra Plat a reparti loke a horta. Despues di a baha A.G.J. na su cas, Polis a para nan y nan a core bay na pia. W.V.R. a bisa Hues cu ta bou di presion di Polis el a reconoce A.G.J. riba potret. Tambe cu Polis a bis’e pa bisa cu e conoce A.G.J. y cu e ta esun Arubiano envolvi. El a bisa Hues cu e no conoce A.G.J.
EX MILITAR VENEZOLANO
Despues a detene R.B.E. riba 29 November 2020 y e lo a bisa cu nan ta yam’e Maracucho. El a desmenti esey. El a bisa cu e ta ilegal y cu a yega di wordo saca 2 biaha y a bolbe den boto. R.B.E. a bisa Hues cu e ta un ex militar di Gobierno Venezolano y door di e situacion na Venezuela el a bin Aruba. El a bisa cu ta W.V.R. a yame pa busca nan pero e no tabata sa di nada. Ora cu e tabata cu nan den auto, Polis a para nan y nan a core bay. Hues a mustra cu R.B.E. na Polis a declara cu e tabata envolvi den e asalto arma y cu ta e Arubiano A.G.J. a bin cu e plan. El a mustra unda a busca A.G.J. Ta asina cu R.B.E. desmenti esaki tambe.
Hues a bisa cu Polis a haya yamada anonimo cu A.G.J. ta envolvi. Dia 4 December 2020 a detene A.G.J. y W.V.R. a reconoce A.G.J. como e Arubiano cu a planea e asalto. A.G.J., den Corte, a desmenti di sa algo di asalto arma. Hues a mustra cu e amiga di A.G.J. a bisa cu A.G.J. a bis’e di e asalto arma y cu Polis a sigui nan. Segun A.G.J. e amiga a duna declaracion falso contra dje pasobra nan relacion a caba.
EXIGENCIA DI FISCAL
Fiscal a bisa cu e ta haya legalmente proba e asalto arma. El a bisa cu e otro dos Jeffrey y Bryan a huy for di Aruba. E victima tabata den su cas cu un baby. Seis homber a drenta e cas y menaza. Tres di e asaltantenan lo tabata arma. Investigacion a conduci na detencion e tres sospechosonan.
Fiscal a bisa cu e no ta duna importancia cu awor e sospechosonan ta desmenti siendo cu nan a duna declaracion detaya. Awor nan ta bisa cu nan a wordo forza pa declara contra A.G.J. Fiscal ta kere cu den KIA nan lo a wordo menaza. Ademas tin declaracion di e amiga di e sospechosonan kendenan ta bisa cu e sospechosonan ta envolvi den e asalto arma. Fiscal ta considera W.V.R., R.B.E. y A.G.J. complice di e asalto arma.
Fiscal ta haya cu R.B.E. ta sinta ta gaña den Corte. Na opinion di Fiscal, no tin prueba legal di e menaza di e agentenan di Polis pasobra ta un agente so ta bisa esey. El a pidi Hues pa declara R.B.E. liber pa esey.
Fiscal ta haya A.G.J. culpable di menaza, maltrato y destruccion di un auto.
Fiscal a bisa un hende mester sinti su mes sigur den su cas. E asalto arma ta un asunto hopi serio. Hendenan ta keda afecta pa añanan largo y hopi biaha no ta sinti nan mes sigur den nan cas. El a cuestiona e hecho cu ilegalnan ta bin Aruba pa haci asalto arma.
Fiscal exigi 60 luna di prison pa W.V.R, 63 luna di prison pa A.G.J. y 66 di prison pa R.B.E. Hues awor ta bay studia e caso, teniendo cuenta cu defensa di e abogado y dentro di algun siman lo tin sentencia.
