fbpx
May 06, 2021

Kiebro y vandalismo na sede di Xiomara Maduro (MEP)

Share on facebook
Share on Facebook
Share on whatsapp
Share on Whatsapp
0
0
Kiebro y vandalismo na sede di Xiomara Maduro (MEP)
Kiebro y vandalismo na sede di Xiomara Maduro (MEP)


Diadomingo den oranan laat di anochi, Minister mr. Xiomara Maduro, candidato riba lista di MEP, a publica riba su plataforma social, cu antisocialnan a horta varios ekipo den un container na su sede cu ta keda rib’e caminda di Tanki Leendert y Paradera. No ta conoci si esaki ta mara na vandalismo politico of djis ladronnan buscando herment pa horta.

E politico ta sinti su mes tristo, por nota esaki mirando cu rib‘e publicacion a pone su sentimento pa cu e hecho aki. “Minister Xiomara Maduro is feeling sad”, ta e sentimento cu e mandatario encarga cu cultura, finansa y asuntonan economico a publica riba su pagina di facebook. E ta lamenta cu su ekipo di boluntarionan ta trahando duro pa por logra yega na tur locual nan mester pa campaña, pa antisocialnan djis yega horta y bay cu nan propiedadnan asina sin mas. Ladronnan a horta hermentnan y un delco cu e candidato lo a uza pa su campaña di reeleccion. 

Xiomara Maduro a start su carera politico riba lista di MEP den eleccion na aña 2009. Den su salida el a logra haya 260 voto. E tempo ey Nel Oduber a keda for di parlamento pa push’e y dun’e un chens cu consecuencia cu el a crece den e siguiente eleccion, na 2013 yega te na 2445 voto riba su nomber. Cuater aña despues, den eleccion na 2017, bayendo como candidato # 2 riba e lista geel, el a logra 2696 voto individual, un crecemento di 10%. A dun’e e cartera di finansa, asuntonan economico y cultura.

Den eleccion parlamentario na Corsou na maart ultimo, a nota mesun tipo di hugada, sea tabata horta na e sedenan of tabata kibra borchinan di propaganda di diferente politico rond di e isla. Ta spera cu e tendencia negativo aki no crusa lama y yega nos isla tambe pa e temporada aki di campaña electoral. Ta spera cu campaña 2021 mes lo start mas pia despues di diabierna awo 7 di mei 2021, ora cu e partidonan politico bira conoci y e candidatonan cu lo subi lista ta oficial. E ora lo sigui e temporada pa firma pa e partidonan por haya sosten di publico pa bay eleccion. MEP, AVP, POR ni RED no mester firma pasobra nan tin asiento caba den parlamento.  

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.