fbpx
May 06, 2021

MEP: Ta un berguensa cu ex prome minister ta comporta su mes na un manera iresponsabel y desafiante

Share on facebook
Share on Facebook
Share on whatsapp
Share on Whatsapp
0
0
MEP: Ta un berguensa cu ex prome minister ta comporta su mes na un manera iresponsabel y desafiante
MEP: Ta un berguensa cu ex prome minister ta comporta su mes na un manera iresponsabel y desafiante


“Partido MEP ta tumando e campana pa eleccion 2021 na un forma hopi serio y tratando di ta mas cerca posibel di cada ciudadano. Na e momentonan aki, Aruba ta mirando cu e situacion di Covid ta bou control, sinembargo nos como politiconan ta keda preocupa y alerta pa mantene e situacion asina aki. Nos no kier pone salud ni siguridad di ningun ciudadano na peliger cu actonan iresponsabel”, asina Lider di MEP a duna di conoce despues di nota comportacion iresponsabel di cierto politiconan di oposicion.

E fin di siman aki tabata tin campaña den tur barrio. Lider di MEP, Evelyn Wever-Croes tabata den bario di Playa, Seroe Blanco, Santa Cruz y tabata na un accion pa plak sticker na Playa.

“Mi mester bisa cu esaki tabata campaña hopi positivo, e recepcion di tur hende tabata sumamente positivo aki na Aruba y contento di mira nos. Mayoria di hende ta sumamente agradecido di e manera cu nos a atende cu Covid y nan ta pidi nos pa por fabor traha duro pa bin bek un biaha mas den gobierno pa por finalisa e trabou cu nos a bin pa haci.

Esaki sigur ta yena mi di hopi emocion, hopi satisfacion tambe y e agradecimento cu ta biba den comunidad. Tanto esnan cu semper a simpatisa nos y esnan cu den pasado no a simpatisa nos of mi persona ta bisa cu ta danki Dios ta MEP tabata na mando awor cu e pandemia a dal paso si ta cualkier otro partido grandi of chikito, ken sa con e reacionnan tabata. Apesar di e pandemia y e dolor cu e la causa, mi ta kere ta un momento hopi bunita”, Lider di MEP a duna di conoce.

Lider di MEP ta lamenta si cu otro partido y especial lider di partido AVP cu tambe ta representa hopi voto, ta comporta su mes di un forma hopi iresponsabel di ta brasa y sunchi, ta para trafico kibrando asina tur regla. Esaki ta un berguensa. Pasobra durante campaña tambe nos tur mester sigui cuida pa no plama e virus.

“Sinceramente como ciudadano di pais Aruba, e ta bergonsa mi cu tin un persona cu tabata Minister President dos biaha di e pais aki, y ta comporta su mes di un forma asina desespera y iresponsabel. Tin mas ex Minister President di e pais aki manera sr. Nel Oduber of sr Henny Eman cu no ta comporta nan di un forma asina iresponsabel y desespera. Pasobra nan ta hendenan serio cu a goberna e pais aki, cu excepcion di Mike Eman. Mi ta lamenta profundamente su actitud iresponsabel y desafiante”, Lider di MEP a expresa.

Den fin di siman, Polis mester a bay para Mike Eman den varios ocacion. No ta solamente tristo sino un berguensa. Ta di spera cu pueblo di Aruba mira bon cla cu un persona cu un actitud asina, no mester drenta den gobierno. Cu un persona iresponsabel, desafiante na tur regla cu demas pais si mester sigui pa asina e virus no sigui plama, no por bin nunca na manda di nos pais pasobra e ora nos por conta cu di berdad e pais aki lo bay den e rumbo negativo unda nos no kier e bay.

“Mi kier a desea tur e candidatonan nobo cu a wordo lansa riba tur e diferente partidonan hopi exito. No ta un trabou facil pero si hopi noble y un compromise cu pais Aruba. Mas politico serio y integro nos haña, irespecto di e color politico, miho e ta pa henter Aruba. Hopi exito especial e siman aki cu ta e siman pa entrega lista y ban spera cu tur politico incluyendo esunnan irepsonsabel aworaki, sa di mantene e reglanan pa asina protehe nan salud, nan famia y e salud di e ciudadanonan di Aruba”, Lider di MEP a termina bisando.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.